Vroͤit úch stolzen leigen

Vroͤit úch stolzen leigen·
der anger vnd dú heide breit·
bi dem liehten meien·
stet wunneklich bekleit·
húre wol besvngen·
in svͤzer wise wirt der walt·
svmer hat verdrungen·
den leiden winter kalt·
blvͤnder hag vnd lǒb vf gruͤnen linden·
lilien rosen viol lant sich vinden·
erwachet ist dú nahtegal·
vnd tv̊t truren swinden·
ir froͤidericher schal·

Meie ist wol geschoͤnet·
er tůt den vogelin swere bv̊s·
svͤzen luft dvrh doͤnet·
der lerchen svmergrůz·
svnnen glast vf heide·
durlúhtet blv̊men vnd kle·
richer ǒgenweide·
wirt húre michels me·
swa lieb liebe ein lieblich lachen bútet·
vnd lieb mit liebe liebe trútet^{[WS 1]}·
dan lieber wibe steter lib·
leit mit liebe vs rútet·
in werder^{[WS 2]} geselleschaft·

Swa sich liebe neiget·
dur lieb in liebes herzen grunt·
vnd lieb minne erzeiget·
da wirt lieb liebe kvnt·
lieber wibe trúwe
lieblich sich liebet alle tage·
lieb vertribet rúwe·
lieb wendet^{[WS 3]} sende klage·
liebú wib sint aller liebe ein wunne·
lieber lieb belúhtet niht dú svnne·
danne lieber wibe steter lib·
swer zelobe iht kvnne·
der lobe dú lieben wib·

Anmerkungen (Wikisource)

1. Vorlage: tútet.
2. Vorlage: im w̾de.
3. Vorlage: ſendet.