Warnet úch gar ivnge vnd alde
[243r]
Warnet úch gar ivnge vnd alde·
gegen dem winder· des ist zit·
nieman blôsser vor im halde·
er sleht tiefe wunden wit·
lant die schilde· stille ligen·
sit iv selben kleider milde·
so mvget ir im angesigen·
Ich wil úch des besten wisen·
welt ir vor im sin behv̊t·
so svlt ir dú húser spisen·
gegen im ist iv niht so gv̊t·
swer mit witzen· nv niht vert·
sit er wil dú hvs besitzen·
der ist vor im vnernert·
Fv́r sin stúrmen fúr sin slichen·
fúr sin vngefůge dro·
svln wir in die stuben wichen·
da mit wiben wesen fro·
wibes gvͤte· dú ist ein dach·
dc man nie fúr vngemvͤte·
also gv̊tes niht gesach·
Aller gv̊ten wiben guͤte·
mvͤsse iemer froͤiden pflegen·
vor ir zúrnen mich behvͤte·
got· dast[WS 1] min morgen segen·
gv̊tes wibes· werdekeit·
ist fúr war gar mines libes·
hoͤster trost fúr sendú leit·
Mines herzen froͤiden lere·
ist ein svͤsser wibes lip·
dú ist min trost fúr herzesere·
si ist fúr war ein wiblich wib·
vnd ein frowe· maniger tvgent·
swen ich in ir ougen schǒwe·
mich so blvͤt mir froͤiden ivgent·
Anmerkungen (Wikisource)
- ↑ Vorlage: dc.