Was hilfet mich das ich ze froͤmdē froͤidē var

Was hilfet mich das ich ze froͤmdē froͤidē var·
ſolde ich dē geſtē froͤide machē·
die wile ich ſelber trurig bin·
es mvͤſ eī wib ê froͤide bi mir ſendē dar·
in kā in allen niht gelachē·
ſi lache mir ſo lache ich in·
minr froͤidē hoꝛt lit ī ir hůte·
da pfendet mich dú liebe gewalteklichē mitte·
ſi ſelig wib ſi reinú gv̊te
vnſpꝛechēd ich ſi zallen zitē bitte·
in ſtvmmē wiſ vn̄ mit v̾ſwignē mv̊te·
ſus flehe ich ſi nach toꝛē ſitte·

Wer ich nv mī als ich min ê geweſē bin·
ſo lachet ich vs vꝛiem mv̊te·
vꝛilich al dvr min ſelbes mvnt·
nv hat ein wib vn wiſſende min h̾ze hin·
ſolt ich ir h̾zen tůn dē ſm̾zē·
zerehte al dvr ir oꝛe kvnt·
v̾miſſete ich dāne bi den lúten·
Min ſelbes ſo funde ich doꝛt vil lihte mich in ir gewalt·
ſol ich ſi ſwigēde alſvs trúten·
das ſwigē tůt mich trureklichē alt·
mv̊ſ ab̾ ich irs mit rede gar betútē·
owe ſo dvnke ich ſi zebalt·

Daſ ſi mir iſt ſo rehte lieb tet ir dc wol·
ſo tet es mir niht we ſo ſere·
als eſ nv tv̊t vil manige ſtvnt·
ſol ich ir gebē vō minē froͤidē diſen zol·
dc ſi da mit ir froͤide mere·
ſo truwe ich wirt ir rehte kūt·
wie mīne wider mīne mīnet·
vn̄ wie dú liebe mit d̾ wage liebe geltē mv̊s·
ſo ſi ſich des rehte v̾ſinnet·
ſo winde ir h̾ze ī roteſ mvndes grůs·
mit wiſſē zenen harte wol bezīnet
vn̄ tv̊ mir da mitte trurenſ bůs·