Was hilfet mich das ich ze froͤmden froͤiden var

Was hilfet mich das ich ze froͤmden froͤiden var·
solde ich den gesten froͤide machen·
die wile ich selber trurig bin·
es mvͤs ein wib ê froͤide bi mir senden dar·
in kan in allen niht gelachen·
si lache mir so lache ich in·
minr froͤiden hort lit in ir hůte·
da pfendet mich dú liebe gewalteklichen mitte·
si selig wib si reinú gv̊te
vnsprechend ich si zallen ziten bitte·
in stvmmen wis vnd mit verswignem mv̊te·
sus flehe ich si nach toren sitte·

Wer ich nv min als ich min ê gewesen bin·
so lachet ich vs vriem mv̊te·
vrilich al dvr min selbes mvnt·
nv hat ein wib vn wissende min herze hin·
solt ich ir herzen tůn den smerzen·
zerehte al dvr ir ore kvnt·
vermissete ich danne bi den lúten·
Min selbes so funde ich dort vil lihte mich in ir gewalt·
sol ich si swigende alsvs trúten·
das swigen tůt mich trureklichen alt·
mv̊s aber ich irs mit rede gar betúten·
owe so dvnke ich si zebalt·

Das si mir ist so rehte lieb tet ir dc wol·
so tet es mir niht we so sere·
als es nv tv̊t vil manige stvnt·
sol ich ir geben von minen froͤiden disen zol·
dc si da mit ir froͤide mere·
so truwe ich wirt ir rehte kunt·
wie minne wider minne minnet·
vnd wie dú liebe mit der wage liebe gelten mv̊s·
so si sich des rehte versinnet·
so winde ir herze in rotes mvndes grůs·
mit wissen zenen harte wol bezinnet
vnd tv̊ mir da mitte trurens bůs·