Was iſt dc liehte dc luzet her vúr

Was iſt dc liehte dc luzet her vúr·
vs dē ivngē gruͤnē gras alſ ob es ſmiere·
vn̄ es vns eī gruͤzen wil ſchimpfē mit abe·
es ſint die blv̊mē dē ſvm̾ ich ſpúr·
an dē vogellein vn̄ an manigē tiere·
ahtēt ob nat̃e iht zeſchaffenne habe·
ê dc aller dinge·
ſtelle nah der zit·
got gebe dc der herbeſt ſin ere volbꝛinge·
ſit deſ mēſchē froͤide gruntveſte da lit·

Wan gv̊t gedinge ſo meht ich ſin tot·
vō ir ſtetem nein ich vn̄ in getv̊n es nimmer·
dv́ niht wā ia g̾ne hat vundē an mir·
wā ſiht ǒch dike dc ſchoͤn abēt rot·
kvmt nah manigē moꝛgē d̾ troͤibe iſt vn̄ timm̾·
da vō ich mit dienſte niht wenke vō ir·
dú vō māigen iarē·
mir noh lonē ſol·
ach het ich erwoꝛbē die ſvͤzen die clarē·
do wart einē māne zer w̾lte nie ſo wol·

Sich lat doch bꝛechē d̾ h̾te adamas·
ſwēne er voꝛ begoſſē wirt mit bokes blůte·
alſo moͤht ǒch gnade mit liebe v̾iagē·
ir vngenade dvr liebe noh bc·
wer geſas bi gote an dē rate da dv́ gůte·
mir wart wid̾ teilet des hoͤꝛe ich niht ſagē·
liebe ī gv̊te eīvaldig·
wehſel mir dú leit·
habs ī hoherm mv̊te des biſt dv gewaldig·
ſo wirt dir merer mv̊t zename geſeit·