Was ist dc liehte dc luzet her vúr

Was ist dc liehte dc luzet her vúr·
vs dem ivngen gruͤnen gras als ob es smiere·
vnd es vns ein gruͤzen wil schimpfen mit abe·
es sint die blv̊men den svmer ich spúr·
an den vogellein vnd an manigen tiere·
ahtent ob nature iht zeschaffenne habe·
ê dc aller dinge·
stelle nah der zit·
got gebe dc der herbest sin ere volbringe·
sit des menschen froͤide gruntveste da lit·

Wan gv̊t gedinge so meht ich sin tot·
von ir stetem nein ich vnd in getv̊n es nimmer·
dv́ niht wan ia gerne hat vunden an mir·
wan siht ǒch dike dc schoͤn abent rot·
kvmt nah manigem morgen der troͤibe ist vnd timmer·
da von ich mit dienste niht wenke von ir·
dú von manigen iaren·
mir noh lonen sol·
ach het ich erworben die svͤzen die claren·
do wart einem manne zer werlte nie so wol·

Sich lat doch brechen der herte adamas·
swenne er vor begossen wirt mit bokes blůte·
also moͤht ǒch gnade mit liebe veriagen·
ir vngenade dvr liebe noh bc·
wer gesas bi gote an dem rate da dv́ gůte·
mir wart wider teilet des hoͤre ich niht sagen·
liebe in gv̊te einvaldig·
wehsel mir dú leit·
habs in hoherm mv̊te des bist dv gewaldig·
so wirt dir merer mv̊t zename geseit·