We dir leider winter kalt

We dir leider winter kalt·
heide vnd anger vnd den walt·
hastu gar berǒbet maniger wunne·
swêre tage vnd scharfen luft·
machent is sne rifen tvft·
truͤben schin durh nebel git dú svnne·
wa nv kleiner vogelin svͤzes kosen·
wa lǒb gras wa lýlien viol rosen·
wa nv megde reigen vndder linden·
solhe vroͤide vns winter tv̊t verswinden·

Wie sol sorgen werden rat·
sit der kalte winter hat
blv̊men vil geselwet in den ǒwen·
disú leit darf ringe wegen
er sol hoher froͤide enpflegen·
swer ein rein selig wib mag schǒwen·
so dc si mit steter liebe in meine·
er si vro der winter schat im kleine·
minne ein wib in rehter wibes gvͤte·
vúr^{[WS 1]} die blv̊men vnd des meien blvͤte·

Wol dir werder wibes lib·
wol dir hoher name ein wib·
wol dir reines^{[WS 2]} wibes svͤze minne·
wol dir wan dv bist so gv̊t·
dv kanst gvͤten svren mv̊t·
sendes herzen froͤide ein vuͤgerinne·
wol dir hoh gelobtú creatúre·
din geselleschaft ist gar gehúre·
wol dir wib vnd wol im der dich prise·
wib din name ist wunne im paradýse·

Anmerkungen (Wikisource)

1. Vorlage: vú.
2. Vorlage: reiner.