Went ir hoͤren einen gemellichen strît
[107r]
Went ir hoͤren einen gemellichen strît·
hat ein alter man mit sinem wibe·
vil dike greif er nider vnd zuht ein schit·
si sprach truz dú rede von iv belibe·
ir hant mir leides dike vil gesprochen·
ich sach úch ein abent túkelin began
ein tvmber gǒch dc ist noch vngerochen·
Min alter man der zúrnet vnd ist ime leit·
ob ich einen ivngen gerne minne·
doch darvmbe lâsse ich niht in si gemeit·
ich han an in bewendet mine sinne·
dc ich dur sin grinen nien enlâsse·
stôsse eht ich in vor mir vs was wirret dc·
lit ein alter grússing an der strâsse·
Got der sende an minen leiden man den tot·
dc ich von dem úlben werde enbvnden·
selker fluͤche wer mir zallen ziten not·
solde ein wib vor leide sin verswunden·
dc wer ich vor einem halben iare·
ich beswenke in lihte dc ers niene weis
enrůche eht er swie suͤsse ich mich gebare·
Got gebiete miner frowen dc si si·
senftes mv̊tes vnd ân argen willen·
zware e ich ir lêge lastlichen bi·
e lîes ich mich schern vnd villen·
in gesach nie wib mir senfter guͤte·
si sol dvr mich lassen dc er laster si
ich enkan ir anders iht gehvͤte·