Wie gerne ich mit froͤiden were
[153r]
Wie gerne ich mit froͤiden were·
wer vnfroͤide niht so wert·
nv ist den richen froͤide vnmere·
mêre ist swer ir zerehte gert·
ob ich an mir selben fvnde·
dc ich mih hohes mv̊tes gerne vnderwunde·
sone fvnde ich niht den núnden der mirs gvnde·
Ich mv̊s lieben vnd leiden·
leiden trost von schulden geben·
trúwe vnd ere verret beiden·
beiden nieman kan geleben·
alte sitten ivngen lúten·
swer dv́ beide mit einander nv wil trúten·
der wirt gar zespotte kan ers niht verchúten·
Liezen tǒben sich die wisen·
wisen vf der selden vart·
so kvnde ich ir leben prisen·
prisen wir ir tǒben art·
dc mag wol ir tvgent gerúwen·
do man alte sach dvr zuht die ivngen blv́wen·
do stůnt es an eren bas vnd ǒch an trúwen·
Wer sol sich an valschen keren·
keren sich die valschen dran·
die niht gern wan valscher eren·
eren kraft nie man gewan·
wan der eine der des varte·
dc er so mit trúwe vnd ǒch mit zuht gebarte·
dc er sich niemer an ir betagete noh ǒch beiarte·
We dc wir so kranke werben·
werben anders danne also·
est zeivngest niht wan sterben·
sterben alse lihte vro·
so dc wir die tage verswenden·
ane froͤide vnd doh mit sorgen [153v] niht verenden·
wc sol truren fúr dc nieman kan erwenden·