Wie kvnde leider mir geschehen

Wie kvnde leider mir geschehen·
wand ich den wahter hoͤren iehen·
dc es si tag·
so redet ein schone frowe gůt·
wider einen ritter hohgemv̊t·
der bi ir lag·
si sprach me dv tů mir frúndes trúwe schin·
vnd gib mir stat enmitten in dem herzen din·
das ich da gewaltig frowe mvͤze sin·

Do sprach der ritter ellenthaft·
din liebe hat so grosse kraft·
wider minen lip·
dc si niht grosser moͤhte sin·
dv wonest mir in dem herzen min·
vil reine wib·
so dc mir niemer lieber kan geschehen·
danne ob ich dich tǒgen mvͤsse^{[WS 1]} sehen·
mines herzen wil ich dir vúr eigen iehen·

Dú vrowe ir lieb zv̊ ir gevie·
si sprach sit mir belibet hie·
dc herze din·
vnd ich des so gewaldig bin·
so vuͤre ǒch dv dc mine hin·
geselle min·
so dc si steter liebe anander streben·
ach herre frúnt geselle miner froͤide leben·
gedenke wc wir beide han gegeben·

Do kvste er do wol tvsentstunt·
ir minneklichen roten mvnt·
sam tet si in·
sih hv̊b gros weinen von ir hie·
dc si niht moͤhte wissen wie·
er keme hin·
si sprach we mir alse diner balden iage·
nv wilt dv von mir dc ist mines herzen klage·
lige eht einne wile est niender gegen dem tage·

Doh mv̊sten si sih scheiden do·
des scheidens waren si vnvro·
doch mvͤst es sin·
der tag der sleich in balde zv̊·
nv enweis ich leider wc ich tů·
wan frowe min·
diner tvgent vnd diner hohen werdekeit·
der sol nv min steter dienest sin bereit·
dc si bi dem hohsten eide dir geseit·

Anmerkungen (Wikisource)

1. Vorlage: mvͤſte.