Winter dine kalte rifen

Winter dine kalte rifen·
kalde winde vnd ǒch der sne·
swas die gruͤnes mvgent begrifen·
desn^{[WS 1]} gesiht man iarlanc me·
in so wúneklichem schine·
seht dc lâs ich alles sin·
wan ich lide grosse pine·
von der liebú frowen min·
Des wil dú reine
gelǒben vil kleine·
wan si hat gemeinen grůs mir gar verzigen·
vnd lat mich sender not zepfande ligen·
von welhen schulden
mv̊s ich es dulden
ald wa von·
hat si mir ir grůs verseit deswar ich bins vngewon·

Solt ich wúnschen mir zeheile·
dar nah als min wille stat·
so neme ich ze minem teile·
fúr swas nv ieman gv̊tes hat·
dc dú reine in wibes gvͤte·
spreche lieb ich bin dir holt·
dc froͤit min gemuͤte
bas danne alder kriechen golt·
Des wil dú reine
gelǒben vil kleine·
wan si hat gemeinen grůs mir gar verzigen·
vnd lat mich sender not zepfande ligen·
von welhen schulden
mv̊s ich es dulden
ald wa von·
hat si mir ir grůs verseit deswar ich bins vngewon·^{[WS 2]}

Nieman ahte mir gen gv̊te·
froͤide vnd froͤiderichen mv̊t·
froͤide in edels mannes mvͤte·
tůt bas dan alles sin gv̊t·
wurd mir ein lieplich smieren
von der frǒwen min bekant·
vnd ein minnekliches zwieren·
dc neme ich fúr tvsent lant·
Des wil dú reine
gelǒben vil kleine·
wan si hat gemeinen grůs mir gar verzigen·
vnd lat mich sender not zepfande ligen·
von welhen schulden
mv̊s ich es dulden
ald wa von·
hat si mir ir grůs verseit deswar ich bins vngewon·^{[WS 3]}

Unwerde vnd gar vnmere·
húre vnwerder danne vert·
bin ich der ich gerne were·
gar vor allen dingen wert·
si tůt niender dem geliche^{[WS 4]}·
sam si welle erhoͤren mich·
nv nême ich vúr tútsche riche^{[WS 5]}·
dc si bas bedehte sich·
Des wil dú reine
gelǒben vil kleine·
wan si hat gemeinen grůs mir gar verzigen·
vnd lat mich sender not zepfande ligen·
von welhen schulden
mv̊s ich es dulden
ald wa von·
hat si mir ir grůs verseit deswar ich bins vngewon·^{[WS 6]}

Frowe schoͤne minnekliche^{[WS 7]}·
frowe kúsche wol gezogen·
frowe in guͤte froͤidenriche^{[WS 8]}·
wunsch^{[WS 9]} hat an iv niht gelogen·
ach solt ich úch kússen tǒgen·
dc were vnuergolten gelt·
an den munt vnd in dú ǒgen·
dc neme ich fúr alle die welt·
Des wil dú reine
gelǒben vil kleine·
wan si hat gemeinen grůs mir gar verzigen·
vnd lat mich sender not zepfande ligen·
von welhen schulden
mv̊s ich es dulden
ald wa von·
hat si mir ir grůs verseit deswar ich bins vngewon·^{[WS 10]}

Anmerkungen (Wikisource)

1. Vorlage: des.
2. Vorlage: Des wil dú reine· ⁊c̾·
3. Vorlage: Des wil dú reine·
4. Vorlage: gelich.
5. Vorlage: rich.
6. Vorlage: Des wil dú reine ⁊c̾·
7. Vorlage: mīneklich.
8. Vorlage: froͤidērich.
9. Vorlage: wūſ.
10. Vorlage: Des wil dú reine·