Wol zimt der edelstein in rotem golde
[422v]
Wol zimt der edel stein in rotem golde·
sam zieret einen schoͤnen lip·
es si ein magt ein man ein wib·
ob er mit edelen tvgenden ist gerichet·
dú tugent si der stein man hab in holde·
durh dc er dienet werden solt·
des libes schoͤne si dc golt·
er selig swer den beiden sich gelichet·
fro solt er sin· er stuͤnde er liefe· er gienge·
swer aber bi schoͤne vntugende pfliget·
da siht man dc in golde liget·
dc glas vn art da hat gesiget·
swie rot si vssen si· vnertig innen ist hiefe·
Dvrh einen holn stab mit ateme triben[WS 1]·
sach ich vil kleiner kúgellin·
der sin da pflag der vůgte pin·
vil vngewarnet mangem vogelline·
ich sprach mag vor den listen iht beliben·
...
dur den stab runet man verholn
getruwer man dc bringet dich zepine·
nv si der stab an lugeneren verborgen·
der stiftet mort mit sinen lúgen·
ob sich die slehten von im zúgen·
vnd dc die kleinen vogel flúgen
von holme stabe si moͤhten senftern beidenthalp ir sorgen·
Zwene schútzen sach ich spannen vnd schiessen·
der eine wc des libes gros·
an dem ich sach dc mich verdros·
dc bein im in dem spanne zitert sere
der schútze er vil verhv̊b des bunde erdriessen·
der govme sin ein michel teil·
got gebe dem kleinen schútzen heil·
baltliche spien er nach der tvgenden lere·
er schos ǒch snelle zv̊ den vienden schone·
ein arger man des gv̊tes rich·
dem grossen schútzen was gelich·
den kleinen schútzen den mas ich·
zemiltem man mit kranker habe des wart im lob zelone·
Stoc vnd steine schraft vf helem ise·
swer in der rúhe riten sol·
sin pfert er sol beslahen wol·
er gat es so so hat er sich gewarnet·
billich an eines mannes mv̊t ich prise·
der in der werlte dvr dc iar·
mv̊s werben vmbe des libes nar·
nv wissent dc er den nuz harte erarnet·
da von er sich den lúten mv̊s gelimpfen·
ich mas den stoc vnd ǒch den stein·
zen vngefuͤgen rehte allein·
die sint der werlt ir valscher mein·
die sint der schraft vnd ǒch dc is klein ist ir frúntlich schimpfen·
Was tůt gar we dem herzen wol den ǒgen[WS 2]·
das tůt din schoͤne ein wiblich wib·
ir wiblich schoͤne ir reiner lip·
dvr mannes ǒge im in sin herze dringet·
dar nach zehant dú liebe slichet tǒgen·
dvrh ǒgen minne gerndem man·
im in sin herze svnder wan·
zehant dú liebe mit dem herzen ringet·
si wundet im sin herze vnd alle sin sinne·
es schat dem biderben wibe niht·
die man in schonen eren siht·
vnd ir wiblicher tvgende giht·
si tůt im in den ǒgen wol doch wundet in dú minne·
Swa ich des herze vinde dc in rúwet
ob er ein lúzel tvgenden tůt·
vor liebe erloͤschet im der mv̊t·
so sere dc er sich beginnet rimpfen·
dc laster bier im selben tvgende brúwet·
dc bier sich selben niessen mv̊s·
zehant dú schande ir breiten vůs·
setzet· merkent disen vngelimpfen·
den tvgendeloser man im selben machet·
er tv̊t reht als ein veigú hût·
so si wirt biderben mannes brv̂t·
vnd er si hat in eren trut·
des wert si sich mit smehen sitten si spottet[WS 3] vnd lachet·