Doctor Brants Narrenschiff/Von unnützen Wünschen

Wer wünschet das er nit verstot
Vnd nitt syn sachen setzt zu^o got
Der kumbt zu^o schaden dick vnd spott

Von vnnutzen wünschen.

Der ist eyn narr der wünschen du^ot
Das jm als bald schad ist als gu^ot /
Vnd wan ers hett vnd wurd jm wor
So wer er doch eyn narr als vor

Mydas der kunig wünschen wolt

Das als / das er angriff / würd goldt
Do das wor wart / do leidt er nott
Dann jm zu^o gold wart wyn vnd brot /
Recht hatt er / das er deckt sin hor

Das man nit sa^ech syn esels or

Die dar noch wu^ochsen jn dem ror
We dem / syn wünsch all werden wor /
Vil wünschen das sie leben lang
Vnd du^ont der sel doch also trang

Mit schlēmen / prassen im wynhuß

Das sie vor zyt mu^oß faren vß /
Dar zu^o / ob sie schon werden alt
Sint sie doch bleich / siech / vngestalt
Ir backen vnd hüt sint so la^er

Als ob eyn aff jr mu^oter wa^er /

Vil getzlicheyt die jugent hat
Das altter jn eym wesen stat
Inn zyttern glyder / stym / vnd hirn /
Eyn trieffend naß / vnd glatzecht stirn /

Synr frowen ist er vast vnma^er /

Im selbst / vnd synen kynden schwer
Im schmeckt vnd egfelt nüt was man du^ot
Vnd sicht vil / das jn nit dunckt gu^ot /
Welch leben lang / die hand groß pin

Allzyt jn nüwen vnglück syn

In truren vnd jn sta^etem leidt /
Enden jr tag jn schwartzem kleyd
Nestor / Peleus / vnd Laertes /
Beklagten sich jm alter des

Das sie zu^o lang ließ leben gott

Do sie jr su^en an schowen dot /
Wer Priamus gestorben vor
Vnd het gelebt nit so vil jor
Sa^eh er nit leyd so ja^emerlich

An su^en / frow / do^echter / stat / vnd rich /

Wann Mythridates / vnd Marius /
Cresus / vnd der groß Pompeyus
Nit werent worden also alt
Werent sye dott jn grossem gwalt /

Wer hübscheyt jm / vnd synem kynd

Wünschet / der su^ocht vrsach zu^o sünd
Wer Helena nit gewesen schon
Pariß het sie jn kriechen gelon
Wer ha^eslich gsyn Lucrecia

Sie wer geschma^ehet nit also /

Hett Dyna kropff vnd hofer ghan
Sychen hett sie gelossen gan /
Es ist gar seltten das man treit
Bynander schonheyt vnd küscheyt /

Vor vß / die hübschen hansen nu^on

Die went all bu^ebery yetz du^on
Vnd werden doch gefellet dick
Das man sie sticht jm narren strick /
Mancher wünscht / hüser / frow / vnd kynd

Oder das er vil gulden fynd

Vnd des glich goückels / das gott wol
Erkennt / wie es geroten sol
Dar vmb gibt er vnß ettwan nüt
Vnd das er gibt / nymbt er zu^o zyt

Ettlich dem gwalt ouch wünschen noch

Vnd wie sie stygen vff vast hoch
Vnd btrachten nit das ho^eher gwalt
Dest ho^eher wider abher falt
Vnd das / wer vff der erden lyt

Der darff vor vall sich vo^erchten nyt

Gott gibt vnß alles das er will
Er weyß was recht ist / was zu^o vil
Ouch was vnß nütz sy / vnd kum wol
War vß vnß schad entspringen sol

Vnd wann er vnß nit lieber hett

Dann wir vnß selb / vnd das er da^et
Vnd macht vnß (was wir wünschtten) wor
Es rüwt vnß / ee vß kem eyn jor /
Dann vnser bgir die macht vnß blint

Zu^o wünschen ding / die wider vnß sint

Wer wünschen well das er recht leb
Der wünsch das jm gott dar zu^o geb
Eyn gsunden synn / lib / vnd gemu^et
Vnd jn vor vorcht des todes bhu^et

Vor zorn / begyr / vnd bo^esem gydt

Wer das erwirbt jn diser zyt
Der hat syn tag geleyt baß an
Dann Hercules ye hat gethan
Oder Sardanapalus hatt

In wollust / gfüll / vnd fa^ederwatt

Vnd hatt alles das jm wurt syn not
Darff nit an rüffen glück für got
Eyn narr wünscht synen schaden dick
Syn wünsch würt offt syn vnglück