Dis weren wunnekliche tage

Dis weren wunnekliche tage·
der si mit froͤiden moͤhte leben·
nv hat mir got ein swere klage·
zedirre schoͤnen zit gegeben·
der mir leider niemer wirdet bv̊s·
ich han verlorn einen man·
dc ich fúr war wol sprechen mv̊s·
dc wib nie liebern frúnt gewan·
do ich sin pflac do froͤit er mich·
nv pflege sin got der pfliget sin bas danne ich·

Min schade wer niemanne reht erkant·
ern dúhte in grosser klage wert·
an dem ich trúwe vnd ere ie vant·
vnd swas ein wib an manne gert·
der ist al zegehes mir benômen·
des mac mir vnz an minen tot·
niemer niht zestatten komen·
ine mvͤsse liden sende not·
der nv iht liebers si beschehen·
dú lâsse ǒch dc an ir geberden sehen·

Got hat vil wol zv̊ zir getan·
sit lieb so leides ende git·
dú sich ir beider hat erlan·
der get mit froͤiden hin dú zit·
ich han klage si manigen liehten tag·
Vnd ir gemv̊te stet also·
dc si mir niht gelǒben mag·
ich bin von liebe worden fro·
sol ich der iare werden alt·
dc giltet sich mit leide tvsent valt·