Doctor Brants Narrenschiff/Der Bauern Fortschritt

« Von Koch und Kellner	Sebastian Brant Doctor Brants Narrenschiff	Von Verachtung der Armut »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

Ich hett vergessen nach jnn myr
Das ich nit noch eyn schyff jn für
Do ich der buren narrheyt ru^er

von burschem vffgang

Die buren eynfalt ettwann woren
Nüwlich jnn kurtz vergangenen joren
Gerechtikeyt was by den buren
Do sie floch vß den stett vnd muren

5

Woltt sie jn stro^ewen hüttlin syn

Ee dan die buren druncken wyn
Den sie ouch yetz wol mo^egen tulden
Sie stecken sich jn grosse schulden
Wie wol jn korn / vnd wyn gilt vil

10

Na^emen sie doch vff borg vnd zyl

Vnd went bezalen nit by zyten
Man mu^oß sie bannen vnd verlüten
In schmeckt der zwilch nit wol / als ee
Die buren went keyn gyppen me

15

Es mu^oß syn lündsch / vnd mechelsch kleydt

Vnd gantz zerhacket / vnd gespreyt
Mit aller varb wild / über wild
Vnd vff dem ermel eyn gouchs bild
Das statt volck yetz von buren lert

20

Wie es jnn boßheyt werd gemert

All bschisß yetz von den buren kunt
All tag hant sie eyn nuwen funt
Keyn eynfalt ist me jn der welt
Die buren stecken gantz voll gelt

25

Korn vnd wyn haltens hynder sich

Vnd anders das sie werden rich
Vnd machen selber jnn eyn dür
Biß das der tunner kumbt mit für
So würt verbrent dann korn / vnd schür

30

Des glich by vnser zyten ouch

Ist vff gestanden mancher gouch
Der vor eyn burger / kouffman was /
Will edel syn / vnd ritters gnaß
Der edelman gert syn eyn fry

35

Der groff / das er gefürstet sy

Der fürst der kron des künigs gert
Vil werden ritter / die keyn schwert
Du^ont bruchen für gerechtikeyt
Die buren tragen syden kleyt

40

Vnd gulden ketten an dem lib

Es kunt da har eyns burgers wib
Vil sto^eltzer dann eyn gra^efin du^ot
Wo yetz gelt ist / do ist hochmu^ot
Was eyn ganß von der andern sycht

45

Dar vff on vnderloß die dicht

Das mu^oß man han / es du^ot sunst we
Der Adel hat keyn vortel me
Man fyndt eyns hantwercks mannes wib
Die bessers wert treyt an dem lib

50

Von ro^eck / ryng / ma^entel / borten schmal

Dann sie jm huß hat überall
Do mit verdyrbt manch byderman
Der mit sym wib mu^oß ba^ettlen gan
Im winter drincken vß eym kru^og

55

Das er sym wib mo^eg thu^on genu^og

Wann sie hüt hatt als das sy gelangt
Gar bald es vor dem ko^euffler hangt
Wer frowen glust will hengen noch
Den frürt gar dick so er spricht schoch

60

Inn allen landen ist groß schand

Keynen benu^egt me / mit sym stand
Nyemans denckt wer syn vorderen woren
Des ist die welt yetz gantz voll doren
Das ich das worlich sagen magk

65

Der dry spitz / der mu^oß jnn den sack