Doctor Brants Narrenschiff/Vorrede

« Protestation	Sebastian Brant Doctor Brants Narrenschiff	Der Büchernarr »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

Ein vorred jn das narrenschiff.

Zu^o nutz vnnd heylsamer ler / verachtung
vnd eruolgung der wißheyt / vernunfft vnd
gu^otter sytten / Ouch zu^o verachtung vnnd
straff der narrheyt / blyntheyt / yrrsal vnd
dorheyt / aller sta^et / vnd gschlecht der men
schen / mit besunderm flyß ernst vnd ar-
beyt gesamlet zu^o Basel / durch Sebastia
num Brant / jn beyden rechten doctor.

All land syndt yetz vollheylger geschrifft
Vnd was der selen heyl an trifft /
Bibel / der heylgen va^etter ler
Vnd ander der glich bu^echer mer /

5

In maß / das ich ser wunder hab

Das nyemant bessert sich dar ab /
Ja würt all gschrifft vnd ler veracht
Die gantz welt lebt jn vinstrer nacht
Vnd du^ot jn sünden blindt verharren

10

All strassen / gassen / sint voll narren

Die nit dann mit dorheyt vmbgan
Wellen doch nit den namen han
Des hab ich gedacht zu^o diser früst
Wie ich der narren schyff vff rüst

15

Galleen / füst / kragk / nauen / parck

Kyel / weydlying / hornach / rennschiff starck

Schlytt / karrhen / stoßba^eren / rollwagen
Eyn schiff mo^echt die nit all getragen
Die yetz sint jn der narren zal

20

Eyn teyl keyn fu^or hant über al

Die stieben zu^oher wie die ymmen
Vil vnderstont zu^o dem schiff schwymmen
Eyn yeder der will vorman syn
Vil narren / doren kumen dryn

25

Der bildniß ich hab har gemacht

Wer yeman der die gschrifft veracht
Oder villicht die nit künd lesen
Der siecht jm molen wol syn wesen
Vnd fyndet dar jnn / wer er ist

30

Wem er glich sy / was jm gebrist /

Den narren spiegel ich diß nenn
In dem eyn yeder narr sich kenn
Wer yeder sy würt er bericht
Wer recht jn narren spiegel sicht

35

Wer sich recht spiegelt / der lert wol

Das er nit wiß sich achten sol
Nit vff sich haltten / das nit ist /
Dann nyeman ist dem nütz gebrist
Oder der worlich sprechen tar

40

Das er sy wiß / vnd nit eyn narr

Dann wer sich für eyn narren acht
Der ist bald zu^o eym wisen gemacht
Aber wer ye will witzig syn
Der ist fatuus der gfatter myn

45

Der du^ot mir ouch dar an gewalt

Wann er diß bu^echlin nit behalt

Hie ist an narren keyn gebrust
Eyn yeder fyndt das jn gelust
Vnd ouch war zu^o er sy geboren

50

Vnd war vmb so vil sint der doren /

Was ere vnd freüd die wißheyt hat /
Wie so^ergklich sy den narren stat /
Hie fyndt man der welt gantzen louff
Diß bu^echlin würt gu^ot zu^o dem kouff

55

Zu^o schympff vnd ernst vnd allem spil

Findt man hie narren wie man wil /
Eyn wißer findt das jn erfreüdt
Eyn narr gern von syn brüdern seyt /
Hie findt man doren arm vnd rich

60

Schlym schlem / eyn yeder findt syn glich /

Ich schrott eyn kapp hie manchem man
Der sich des doch nit nymet an
Hett ich jn mit sym namen gnent
Er sprech / ich hett jn nit erkennt /

65

Doch hoff ich das die wisen all

Werdent har jnn han wolgefall
Vnd sprechen vß jr wissenheyt
Das ich hab recht vnd wor gefeit
Sydt ich solch kuntschafft von jn weyß

70

So geb ich vmb narren eyn schweyß

Sie mu^essen ho^eren worheyt all
Ob es jnn joch nit wol gefall
Wie wol Terencius spricht / das
Wer worheyt sag / verdienet haß

75

Ouch wer sich lang zyt schnützen du^ot

Der würfft ettwan von jm das blu^ot

Vnd wann man Coleram anreygt
So würt die gall gar offt beweygt
Dar vmb acht ich nit / ob man schon

80

Mit worten mich würt hyndergon

Vnd schelten / vmb myn nutzlich ler
Ich hab der selben narren mer
Den wißheyt nit gefallet wol
Diß bu^echlin ist der selben vol

85

Doch bitt ich yeden / das er mer

Will sehen an vernunfft vnd er
Dann mich oder myn schwach gdicht
Warlich hab ich on arbeit nicht
So vil narren zu^o samen bracht

90

Ich hab ettwan gewacht zu^o nacht

Do die schlieffent der ich gdacht
Oder villicht by spyl vnd wyn
Sassent / vnd wenig dochtent min
Eyn teyl jn schlytten vmbher fu^oren

95

Im schne / das sie wol halb erfru^oren

Eyn teyl vff kalbßfu^esß gingen sust
Die andren rechten jr verlust
Den sie den tag hetten gehan
Vnd was jnn gewyns dar vß mo^echt gan

100

Oder wie sie morn wolten liegen

Mit gschwa^etz / verkouffen / manchen triegen
Den selben noch zu^o dencken all
Wie mir jr wyß / wort / werck / gefall
Ist wunder nit / ob ich schon offt

105

Do mit myn gdicht nit würd gestrofft

Gewacht hab / so es nyeman hofft

In disen spiegel so^ellen schowen
All gschlecht der menschen man vnd frowen
Je eyns ich by dem andren meyn

110

Die mann sint narren nit alleyn

Sunder findt man ouch na^errin vil
Den ich die schleyer / sturtz vnd wil
Mit narrenkappen hie bedeck
Metzen hant ouch an narren ro^eck

115

Sie wellen yetz tragen on das

Was ettwan mannen scha^entlich was /
Spitz schu^och / vnd vßgeschnytten ro^eck
Das man den milchmerck nit bedeck
Wicklen vil hudlen jn die zo^epff

120

Groß ho^erner machen vff die ko^epff

Als ob es wer eyn grosser stier
Sie ga^end har wie die wilden thier /
Doch so^ellen erber frowen mir
Verzyhen / dann ich gantz nit jr

125

Gedencken zu^o keym argen will

Den bo^esen ist doch nit zu^o vil
Der selben man eyn teyl hie fyndt
Die jnn dem narren schyff ouch syndt
Dar vmb mitt fliß sich yedes su^och

130

Fyndt es sich nit jn disem bu^och

So mag es sprechen / das es sy
Der kappen vnd des kolben fry
Meynt yemant das ich jn nit rhu^er
Der gang zu^on wisen für die thu^er

135

Vnd lyd sich / vnd sy gu^oter ding

Biß ich eyn kapp von Franckfurt bring