Ein Man bedarf wol ſinne

Ein Man bedarf wol ſinne·
der eineſ w̾den wibes hulde wil·
v̾dienē vn̄ ir mīne·
ia mv̊s er haben tvgēde vn̄ fůge vil·
vngefuͤges mannes werbē·
mv̊ſ fúr war gar verderbē·
ſol dem gefuͤgē wirt gelonet ho·

Swa ſo vō tvmbē wibe·
gar vngefuͤgem manne liep geſchiht·
dc birt ir beider libe·
ie doch die lenge h̾zē wūne niht·
ſin vnfůre mv̊s ir leiden·
ſo gat es an ein ſcheiden·
Iêr beider liebe hat ein ende ſchier·

Vn̄ ſol ich niht erw̾bē·
mit dienſte die vil lieben frowē min·
ſo mv̊ſ min lip v̾derbē·
gar ſvnder wanc ſo ſtete wil ich ſin·
ia kan niemer liep von wibe·
geſchehen minē libe·
wan von der gv̊ten die ich zefrowe han·

Dú mag mich fro gemachē·
ſi iſt mins herzen froͤiden lere alſo·
dc ir vil ſvͤſſes lachen·
mir vil ofte bꝛaht mī gemvͤte ho·
ir geberde ir ſchoͤne ir gvͤte·
ir wiplich gv̊t gemvͤte·
hat tvgēde vil an alle miſſetat·

Vn̄ ob ich wúnſchē ſolde·
ein wib mir ſelbē nach dem willē min·
wie ich ſi habē wolde·
dv́ mvͤſte gelich gar miner frowen ſin·
an dem libe an dem mv̊te·
dú reine ſvͤſſe gv̊te·
tůt mir alſo dc ich bin hohgemv̊t·