Ein Man bedarf wol sinne

Ein Man bedarf wol sinne·
der eines werden wibes hulde wil·
verdienen vnd ir minne·
ia mv̊s er haben tvgende vnd fůge vil·
vngefuͤges mannes werben·
mv̊s fúr war gar verderben·
sol dem gefuͤgen wirt gelonet ho·

Swa so von tvmbem wibe·
gar vngefuͤgem manne liep geschiht·
dc birt ir beider libe·
ie doch die lenge herzen wunne niht·
sin vnfůre mv̊s ir leiden·
so gat es an ein scheiden·
Iêr beider liebe hat ein ende schier·

Vnd sol ich niht erwerben·
mit dienste die vil lieben frowen min·
so mv̊s min lip verderben·
gar svnder wanc so stete wil ich sin·
ia kan niemer liep von wibe·
geschehen minem libe·
wan von der gv̊ten die ich zefrowe han·

Dú mag mich fro gemachen·
si ist mins herzen froͤiden lere also·
dc ir vil svͤsses lachen·
mir vil ofte braht min gemvͤte ho·
ir geberde ir schoͤne ir gvͤte·
ir wiplich gv̊t gemvͤte·
hat tvgende vil an alle missetat·

Vnd ob ich wúnschen solde·
ein wib mir selben nach dem willen min·
wie ich si haben wolde·
dv́ mvͤste gelich gar miner frowen sin·
an dem libe an dem mv̊te·
dú reine svͤsse gv̊te·
tůt mir also dc ich bin hohgemv̊t·