Ein núwer svmer ein núwe zit

Ein núwer svmer ein núwe zit·
ein gv̊t gedinge ein herzelieber wan·
die liebent mir enwider strit·
dc ich noch trost zefroͤiden han·
noch froͤwet mich ein anders bas·
danne aller vogellinen sanc·
swa man noch wibes gvͤte mag·
da wart ir ie der habe danc·
dc meine ich an die frowen min·
da mv̊s noch mere trostes sin·
si ist noch schoͤner danne ein schoͤne wib·
die schoͤne machet lieber lib·

Ich weis wol dc dú liebe mag·
ein schoͤne wib gemachen wol·
ie doch swelh wib ie tvgende pflag·
dc ist dv́ der man wúnschen sol·
dú liebe stet der schoͤne bi·
bas danne gesteine den golde tv̊t·
nv iehet wc danne besser si·
hant disú beide rehten mv̊t·
si hoͤhent mannes werdekeit·
swer ǒch die svͤssen erbeit·
dvr si zerehte kan getragen·
der mac von herzeliebe sagen·

Der blic gefroͤwet ein herze gar·
den minneklich ein wib an siht·
wie welt ir danne dc der var·
dem ander lieb von in beschiht·
der ist eht manger froͤiden rich·
so ienes froͤide gar zergat·
wc ist den froͤiden ǒch gelich·
da liebes herze in trúwen stat·
in schoͤne in kúschen in reinen sitten·
swelh selig man dc hat erstritten·
ob er dc vor den froͤmden lobet·
so wissent dc er niht entobet·

Was sol ein man der niht engert·
gewerbes vmb ein reine wib·
si lâsse in iemer vngewert·
es túret doch wol sinen lip·
er tůt dvr einer willen so·
dc er den andern wol behaget·
so tůt in ǒch dú eine fro·
ob im dv́ ander gar versaget·
dar an gedenke ein selig man·
da lit vil selde vnd eren an·
swer gvotes wibes minnne hat·
der schamt sich aller missetat·