Het ich niht and̾s leides me

Het ich niht and̾s leides me·
ſo wolde ich klagen dē gruͤnē kle·
den vns der rife vn̄ ouch der ſne·
v̾derbet hat dar an geſchiht mir leide·
Nv gat mir nach ein ander leit·
das mir ein wib ſo gar v̾ſeit·
ir mīne d̾ mit ſtetekeit·
gedienet hat min lib min h̾ze beide·
Dú mir voꝛ allē wibē·
zefrowē mv̊ſ belibē·
wil mich dú v̾derbē ſo·
wer ſol mih dāne machē vꝛo·
ia wers ir ſv́nde ob ſi iem̾ alſo tete·
Jch was ir ie getrúwe·
vn̄ wirde ir niem̾ núwe·
ſchoner dāne ein ſpiegel glas·
h̾ter dāne ein adamas·
iſt ir dc herze min an rehter ſtete·
Wol^{[WS 1]} der mīne·
dú mine ſinne·
leret· vn̄ keret·
nah der beſtē eine die mā in ald̾ w̾lde erkēnet·
Wol^{[WS 2]} der guͤte der gemvͤte·
Machet· dc mir lachet·
h̾ze vn̄ al die ſinne min· ſwēne ma ſi voꝛ mir nēnet·
E ich den kvmb̾
dē ich tvmb̾·
dulde dur ir hulde·
lieſſe lieb̾ het ich rome vn̄ engellant v̾bꝛēnet·
Vn̄ liege ich dc·
ſo mvͤſſe ir has·
d̾ ich nie v̾gas·
min leit v̾tragē·
ſo wurde krank·
al min geſank·
ir vil w̾dē dank·
mv̊s ich beiagē·
des wurdē tvſent h̾zē lebende ane ſwere·
ſwie min frowe ir^{[WS 3]} v̾ſagē wid̾ mich v̾b̾e·
ſo weis ich noh deſ kúniges niht· d̾ mir gelich̾ dāne w̾e·
was hilfet ſi dc riche gv̊t·
die niht wibes mīne mīnēt·
vn̄ des niem̾ niht begīnent·
das man nēnet hohē mv̊t·
Min hobeſchē zimt dē vꝛowē niht· ſwes h̾ze vnſanfte wol getůt·
vil manig̾ ſv̊chet dur dc iar·
des er doh niht vindē wolde·
ſere mā ſi haſſē ſolde·
die dē wibē ſagent vnwar·
ſwie kleine es mir doch vꝛome· dc ich in nie gelǒg als vmb ein har·
Leid̾ ſine mīnent alle niht als ich·
die da wibes mīne vlizent ſich·
des ſol mī frowe lan genîeſſē mich·
Jone bin ich niht d̾ valſcher mīne gert·
valſch̾ wil ich niem̾ w̾den w̾t·
deſ han ich wol behaldē dꝛiſſeg vert·
Dú ſvͤſſe mīne vn̄ dú vil reine·
die ich doch ſo h̾zeklichē meine·
er wirbe ich an d̾ niht ein kleine·
ſo fúrht ich dc al min ſang v̾zage·
Swie mir min ſelig frowe gvnde·
dc ich ab ir roſe rotē mv̄de·
ir ſvͤſſen grůs erw̾ben kvnde·
ſo v̾durbe gar al mins h̾ze klage·
Swie ich ir mīne niht beiage·
ſo wiſſet dc ich allē froͤiden wider ſage·

Anmerkungen (Wikisource)

1. Vorlage: Sol.
2. Vorlage: Sol.
3. Vorlage: frowe.