Het ich niht anders leides me

Het ich niht anders leides me·
so wolde ich klagen den gruͤnen kle·
den vns der rife vnd ouch der sne·
verderbet hat dar an geschiht mir leide·
Nv gat mir nach ein ander leit·
das mir ein wib so gar verseit·
ir minne der mit stetekeit·
gedienet hat min lib min herze beide·
Dú mir vor allen wiben·
zefrowen mv̊s beliben·
wil mich dú verderben so·
wer sol mih danne machen vro·
ia wers ir sv́nde ob si iemer also tete·
Ich was ir ie getrúwe·
vnd wirde ir niemer núwe·
schoner danne ein spiegel glas·
herter danne ein adamas·
ist ir dc herze min an rehter stete·
Wol^{[WS 1]} der minne·
dú mine sinne·
leret· vnd keret·
nah der besten eine die man in alder werlde erkennet·
Wol^{[WS 2]} der guͤte der gemvͤte·
Machet· dc mir lachet·
herze vnd al die sinne min· swenne ma si vor mir nennet·
E ich den kvmber
den ich tvmber·
dulde dur ir hulde·
liesse lieber het ich rome vnd engellant verbrennet·
Vnd liege ich dc·
so mvͤsse ir has·
der ich nie vergas·
min leit vertragen·
so wurde krank·
al min gesank·
ir vil werden dank·
mv̊s ich beiagen·
des wurden tvsent herzen lebende ane swere·
swie min frowe ir^{[WS 3]} versagen wider mich verbere·
so weis ich noh des kúniges niht· der mir gelicher danne were·
was hilfet si dc riche gv̊t·
die niht wibes minne minnent·
vnd des niemer niht beginnent·
das man nennet hohen mv̊t·
Min hobeschen zimt den vrowen niht· swes herze vnsanfte wol getůt·
vil maniger sv̊chet dur dc iar·
des er doh niht vinden wolde·
sere man si hassen solde·
die den wiben sagent vnwar·
swie kleine es mir doch vrome· dc ich in nie gelǒg als vmb ein har·
Leider sine minnent alle niht als ich·
die da wibes minne vlizent sich·
des sol min frowe lan genîessen mich·
Jone bin ich niht der valscher minne gert·
valscher wil ich niemer werden wert·
des han ich wol behalden drisseg vert·
Dú svͤsse minne vnd dú vil reine·
die ich doch so herzeklichen meine·
er wirbe ich an der niht ein kleine·
so fúrht ich dc al min sang verzage·
Swie mir min selig frowe gvnde·
dc ich ab ir rose rotem mvnde·
ir svͤssen grůs erwerben kvnde·
so verdurbe gar al mins herze klage·
Swie ich ir minne niht beiage·
so wisset dc ich allen froͤiden wider sage·

Anmerkungen (Wikisource)

1. Vorlage: Sol.
2. Vorlage: Sol.
3. Vorlage: frowe.