Het mich der winter bas verlassen

Het mich der winter bas verlassen·
gen dem sumer svnge ich húbschen sang·
nv mv̊s ich mich froͤiden sanges mâssen·
sit min hohgemvͤte ist worden kranc·
bruder tot birt mir grosse swere·
wissent dc ich froͤide gar verbere·
wan dc sterben ist gemeinú not·
Ich bin drierhande schaden·
vaste vberladen·
 
So ist ein ander swere dú mich twinget·
dc die herren mv̊tes sint so kranc·
vnd ir tvgende nieman dar zů bringet·
dc man singe houelichen sang·
hie bi vor was ir dank niht kleine·
nv ist ir lon den leider vngemeine·
dien ir herze in froͤiden swebte enbor·
Ich bin drierhande schaden·
vaste vberladen·^{[WS 1]}

So ist der dritte schade mir gar zeswere·
der ich lange her gedienet han·
dú tůt reht als ob ir si vnmere·
swas ich ir zedienste habe getan·
wer ir lon· gegen mir bc erschossen·
dienstes wer ich iemer vnuerdrossen·
vnd svnge ir noh vil manigen don·
Ich bin drierhande schaden·
vaste vberladen·^{[WS 2]}
 
Ob ich nv uerdurbe von der schulde·
dc der to mir vngenade tv̊t·
vnd ich darbte miner frowen hulde·
dc were gar verzagtes mannes mv̊t·
vmb dc ich der schande
svmelicher hoͤre in tútschem^{[WS 3]} lande
ich wils ellů drú versůchen bas·
Ich bin drierhande schaden·
vaste vberladen·^{[WS 4]}

Anmerkungen (Wikisource)

1. Vorlage: Jch bin dꝛier hande· ⁊c̾·
2. Vorlage: Ich bin dꝛier·
3. Vorlage: tútzē.
4. Vorlage: Ich bin·