Hie ist des meien hohgezit
[239r]
Hie ist des meien hohgezit·
rich an froͤiden rich an aller selekeit·
dú den froͤidelosen git·
trost fúr truren trost vnd lere fúr sendú leit·
herzeliebe frowe sprich·
dv alleine bist min meie sage wie wilt dv troͤsten mich·
Schǒwe selig frǒwe min·
wie der meie sin gesinde troͤsten kan·
sol ich da bi trurig sin·
neina frǒwe froͤwe mich froͤdensiechen man·
tv̊ mir so der meye tv̊t·
der git trostes vil den sinen da bi froͤide richen mv̊t·
Selig frǒwe selig wib·
froͤiden vnd wunnen trost vnd selde miner tage·
dines trostes hat min lip·
lange her gebitten mit maniger senender klage·
wenne kvmt mir froͤiden schin·
wenne wilt dv selig frǒwe troͤsten dc sende herze min·
Ob ich niht geniessen kan·
diner guͤte noch der langen stete min·
so la mich vil senden man·
der geniessen den ich dvrh den willen din·
sol vnd mv̊s gedienen vil·
[239v] dc sint ellú guͤtú wib der lib ich iemer eren wil·
Gv̊ter wibe[WS 1] seligheit·
vnd ir gvͤte dv́ genanden wunder tv̊t·
si zebilde fúr geleit·
dinem mv̊te dc er mir noch werde gůt·
wibe gvͤte erzeige[WS 2] an mir·
das ir aller guͤte ir aller wúnschen mvͤsse danken dir·