Hoher mv̊t nv wis enpfangen

Hoher mv̊t nv wis enpfangen·
in min herze tvsent stvnt·
la dich niht bi mir belangen·
dv bist mir ein hoher fvnt·
al min froͤide wc zergangen^{[WS 1]}·
die het truren mir benomen·
dú ist mir mit dir wider komen·

Hoher mv̊t da ich dich funden·
han dar nig ich iemer me·
mit dir han ich vber wunden·
truren dc mir tet ie we·
dc ist mir gar von dir verswunden·
wol mih wol mich dc ich ie·
min minnegernde herze enpfie·

Hoher mv̊t dich hat gesendet·
mir ein wib dú ere hat·
an die han ich gar gewendet·
mich dc ist der minne rat·
vnder schilden sper verswendet·
wirt dvr si von miner hant·
dv́ dich ze mir her hat gesant·

Hoher mv̊t vnd dú minne·
svlt mir helfen dienen ir·
svnder valsch mit slehtem sinne·
so mac wol gelingen mir·
wart si miner trúwen inne·
so tv̊t mir vil froͤiden kvnt·
ir klein vel hitze roter mvnt·

Hoher mv̊t nach diner lere·
wil ich werben vmb ir lib·
si hat schone si hat ere·
si ist ein reine svͤsse wib·
hoh geborn gar senft vnd here·
gv̊t in rehter mâsse balt·
ir lib wiblich ist gestalt·

Hoher mv̊t dv solt nicht eine·
vogt in minem herzen sin·
mit dir hat da stet gemeine·
dú vil liebú vrǒwe min·
si vil gv̊te suͤsse reine·
hat die minne mit ir braht·
si habent^{[WS 2]} zebv̊se da gedaht·

Hoher mv̊t min herze grvͤsset·
vnd ist worden froͤiden ivnc·
an die brvst es sere stôsset·
hoh es springet manigen sprvng·
werdiv^{[WS 3]} libe drinne bôsset·
dú mih selten růwen lat·
swie hoh min gemvͤte stat·

Anmerkungen (Wikisource)

1. Vorlage: zergange.
2. Vorlage: habē.
3. Vorlage: w̾de.