In dem lvfte svͤssen meýen

IN dem lvfte svͤssen meýen·
so der walt gekleidet stat·
so siht man sich schone zweien·
alles dc iht liebes hat·
vnd ist mit einander vro·
dc ist^{[WS 1]} reht dv́ zit wil so·

Swa sich lieb zeliebe zweiet·
hohen mv̊t dv́ liebe git·
in der beider herze meiet·
es mit froͤiden ellú zit·
trurens wil dú liebe niht·
swa man lieb bi liebe siht·

Swa zwei lieb einander meinent·
herzeklichen ane wanc·
vnd sich beide des vereinent·
dc ir lieb ist ane kranc·
die hat got zesamne geben·
vf ein wunnekliches leben·

Stete libe heisset minne·
liebe minne ist alein·
die kan ich in mime sinne·
niht gemachen wol zv̊ zwein·
liebe mv̊s mir minne sin·
iemer in dem herzen min·

Swa ein stete herze vindet·
stete liebe steten mv̊t·
da von al sin truren swindet·
stete liebe ist also gůt·
dc si stete froͤide git·
steten herzen alles zit·

Moͤhte ich stete liebe vinden·
der wolde ich so stete sin·
dc ich da mit vberwinden·
wolde gar die sorge min·
steter liebe wil ich gern·
vnd vnstete gar verbern·

Anmerkungen (Wikisource)

1. Vorlage: ich.