Ir reinú wib ir werden man

IR reinú wib ir werden man·
es stat also dc mir mv̊s·
ere vnd minneklichen grůs·
nv volleklicher bieten an·
des hab ir von schulden grosser reht danne ê·
welt ir vernemen ich sage iv wes·
wol vierzec iar hab ich gesvngen vnd me·
von minnen vnd als iemen sol·
do was ich sin mit den andern geil·
nv wirt mir sin niht mere es wirt iv gar·
minnen sanc der diene iv dar·
vnd úwer hulde si min teil·

Lat mich an eime stabe gan·
vnd werben vmbe werdekeit·
mit vnuerzagter arebeit·
als ich von kinde han getan·
swie nider ich si so bin ich doch der werden ein·
gnv̊c in miner mâsse hoch·
hassent dc· die nidern ob mich dc icht swache nein·
die werden hant mich deste bas·
dú werde wirde dú ist so gv̊t·
dc man irs beste lob sol geben·
es wart nie lobelicher leben·
denne swa man dem ende rehte tůt·

Welt ich han dinen lon ersehen·
swas dv mir gist dc nimst dv mir·
wir scheiden alle nachent vnd blos von dir·
schame dich sv́l mir alsam geschehen·
ich hate lib vnd sele des wc gar zevil·
gewaget tvsent stunt dvr dich·
nv bin ich alt vnd hast mit mir din gvmpelspil·
vnd zv́rne ich dc so lachest dv·
lache vns noch eine wile also
din iamer tac wil schiere komen·
vnd nimt dir dc dv vns hast genomen·
vnd brennet dich dar vmbe ie doch·

Min sele mvͤsse wol gevarn·
ich han zer welte menigen lib·
gemachet fro man vnd wib·
kvnde ich dar vnder mich bewarn·
lobe ich des libes minne dc der sele leit·
vnd giht es si ein luge ich tobe·
der weren minne giht si ganzer stetekeit·
wie gv̊t si si wie iemer wer·
lib la die minne dú dich lat·
vnd habe die steten minne wert·
mich dvnket der dv hast gegert·
dú ensi niht visch vnz an den grat·

Ich hat ein schoͤne bilde erkorn·
vnd owe dc ichs ie gesach·
vnd ǒch so vil zv̊ ime gesprach·
es hat schoͤne vnd rede verlorn·
da was ein wunder inne das fůr ine weis war·
da von gesweic das bilde iesa·
sin lilien rose varwe wart so kranc var·
dc es verlos smac vnd schin·
min bilde ob ich gekerchet si so la mich vs also·
dc wir ein ander vinden fro·
wan ich mv̊s aber wider in·