Lieb dv hast mich gar gewert

Lieb dv hast mich gar gewert·
swas liebe ich han ze dir gegert·
des hast dv dich dvr mich verwegen·
des si min lib vnd al min leben·
ze widergelte dir gegeben·
der solt dv gar fúr eigen phlegen·
hier vnder bis gemant an trúwe an stete·
der phlig gegen mir als dv vil gerne iê tete·
so wil ǒch ich dv́ beidv́ bir·
vs herzeklicher liebe gir·
mit voller wâge wegen·

Lieb dir sol nit wesen leit·
ob ich dich trúwe vnd stetekeit·
mir zeleistenne habe gemant·
das kvmt von missetrúwe nicht·
das weis der in dv́ herzen sicht·
mir ist din mv̊t so verre erkant·
das ich in weis so ganz vnd so vermessen·
das dv nit stete noch trúwe macht vergessen·
das ich das weis so sicherlich·
das ist ein ding das iemer mich·
hin zv̊ dir bindet vnd ie bant·

Lieb ich weis dins lobes me·
lange werende es dir beste·
das hat din lib vnd ǒch din mv̊t·
din lib hat schoͤne vnd gv̊te ivgent·
din mv̊t wisheit vnd ganze tvgent·
hie mitte bist dv wol behv̊t·
was sol ein v́ber mêssig lob gesvngen·
dis lob swie kvrz es si mit rede getwungen·
es ist doch vollen wît vnd breit·
vnd hat da bi mâzze vnd warheit·
das solt dv han von mir vúr gv̊t^{[WS 1]}·

Anmerkungen (Wikisource)

1. Vorlage: vergv̊t.