Nement war (Mit aufgelösten Abbreviaturen)
[85v]
Nement war·
wie gar·
wc der meige vollen braht·
des wat·
zergat·
die der svmer hat erdaht·
der sneit·
sin kleit·
beide vf berge vnd in dem tal·
da sanc·
erklanc·
der vil lieben nahtegal·
Aller sorgen fri·
vf gruͤnem zwi·
ir mv̊t·
wc gůt·
ze sange snel·
Da bi wunnen spil·
si donde vil·
ir stimme dú was hel·
Vnd wc froͤiden vol·
si sank so wol·
ir schal·
ergal·
al in den walt·
kleiner vogelin dos·
der was so gros·
si waren froͤiden balt·
Ir singen·
kvnde bringen·
der welte hohen mv̊t·
dú ǒwe·
mit tǒwe·
stat leider vnbehůt·
der anger·
niht langer·
mag blv̊men nehte getragen·
Dú heide·
stet leide·
dc mv̊s ich lerchen klagen·
Dien kinden·
bi linden·
der schatte ist nv benomen·
Dien kvnne·
der wunnen·
nv leider niht bekomen·
Ir krenzel·
ir swenzel·
die waren so gemeit·
[86r] der winder·
hin hinder·
si twinget dast mir leit·
Ich tvmber·
den kvmber·
liese ich wol also sin·
Gebe húre·
mir stúre·
min svͤsse troͤsterin·
dú wendet·
vnd endet·
wol mines herzen not·
Nein svͤsse·
dc buͤsse·
mit dinem mvnde rot·
Din smieren·
kan zieren·
schone dich vil selig wib·
din lachen·
machen·
kan wol senden siechen man·
Din ǒgen
vil tǒgen·
kvnnen wol dvr ganzen lip·
In herzen·
smerzen·
fuͤgen frowe sich daran·
Din ivgende·
mit tvgende·
hat so minneklichen schin·
Ich kroͤne·
schoͤne·
dich fúr al des meien blv̊t·
Ach reine·
nv meine·
mich vil liebe frowe min·
von leide
scheide·
troͤste minen senden mv̊t·
Vnd tůst dv dc·
deswar so wirt mir bas·
vnd swindet min leit·
sit ich nie vergas·
swa man wibes gvͤte mas·
diner werdekeit·
Ich bin dir vndertan·
vnd da bi svnder wan·
dir ze dienste erborn·
Dv solt geniessen lan·
mich frowe dc ich han·
dich mir vs erkorn·
vor in allen·
gevallen·
mv̊s mir din wiblich sin·
Nv ahte·
vnd trahte·
wie ich din eigen bin·
vnd lasse·
die strasse·
mir noch ze wunne zemen·
Din ere·
von sere·
sol mich ze froͤiden nemen·
Dú minne·
mir sinne·
enzvket mit vngewinne·
Est wunder·
besvnder·
behabe ich den lip darvnder·
Vil svͤsse·
dc buͤsse·
e dc ich verderben mv̊sse·
Ich stirbe·
verdirbe·
ist dc ich niht heil erwirbe·
Sus mv̊s ich in sorgen·
vil dike worgen·
den abent den morgen·
vnd ellú zit·
Dú liebe dú reine·
die ich da meine·
mir fuͤget den klagelichen strit·
ach frǒwe gedenke·
die swere verkrenke·
sit ich niht wenke
mit dienste von dir·[WS 1]
Dvr wiplich ere
mir leit verkere·
mit fůge nah hovelicher gir·
ach frowe·
din schowe·
gelichet den rosen in tǒwe·
din guͤte·
der bluͤte·
des[WS 2] meigen vnd din gemvͤte·
Nement war·
gar·
dar·
wie mich dv́ schoͤne twinget swar ich var·
Min mv̊t·
gv̊t·
frůt·
wirt an mir ob si lobeliche tůt·
Ich singe·
ich ringe·
mit manigem dinge·
nach lones stat·
dur trúwe·
gip núwe·
mir[WS 3] froͤide der ich dich ie bat·
Nv lone·
mir schone·
dvr rehte wibes krone·
vnd wise·
mich lise·
ze froͤiden sit ich dich prise·
Mit willen·
solt dv mir stillen·
die senden not vnd mine klage·
So wurde·
mir iamers burde·
geringet die ich da trage·
Mirst ande·
dc dir ze pfande·
min herze stet so lange her·
dc lâsse·
nach minnen mâsse·
mir ledig dast min ger·
Nv blike·
mir dike·
dc loͤset die minnen strike·
Mit ǒgen·
vil tǒgen·
vnd troͤste mich svnder lǒgen·
dú sint so clare·
dc sprich ich zeware·
vil offenbare·
vnd ist wol schin·
Din lieht antlútze·
fúr truren nv̊tze·
dc ist an dem gelǒben min·
Din mvnt nach rosen·
gevar kan kosen·
wol svnder losen·
der tvgende wort·
nv gruͤsse·
mich suͤsse·
mit svͤssem gruͤsse·
so vinde ich miner froͤiden hort·
Swer wunne·
kvnne·
rehte spehen·
an wibe·
libe·
vnd ǒch ir mv̊t·
Ir zuhte·
túhte·
mv̊s ir iehen·
vor schanden·
banden·
si ist wol behv̊t·
Mit klv̊gen·
fůgen·
si ist erzogen·
nach eren·
leren·
tvgende rich·
Ir wirde·
girde·
ist vmbetrǒgen·
ir minne·
sinne·
hat si zúhteklich·
Lop kan si verschulden wol·
da von man ir sprechen sol·
si ist tvgenden vol·
dú reine fruht·
Ach si ist so rehte gv̊t·
doch besweret si mir den mv̊t·
dú froͤide hat von mir fluht·
Minne suͤsse troͤsterin·
tů mir diner helfe schin·
alder ich bin tot·
Twinc die lieben alse mich·
oder es wirt[WS 4] vngemenlich·
ich lebe in sender not·
Mich krenket·
versenket·
swie minne min niht gedenket·
E· liebe
zerkliebe·
min herze gar zerstiebe·
Ich bin verseret·
dú sorge· mir meret·
gedinge si keret
der froͤiden hin dan[WS 5]·
wil minne verleiten·
mit arebeiten·
mich also froͤidelosen man·
Ich han nv lange·
mit minem gesange·
der froͤiden gedrange·
gevolget nach·
Des ist dv́ minne·
min meisterinne·
vnd ist ir von mir gach·
Nv singen·
nv singen·
dannoh harte erspringen·
Den reigen·
den reigen·
pfaffen vnd leigen·
Nv lâsse·
nv lâsse·
vns reigen an der strasse·
die rifen·
die rifen·
die went vns hie begrifen·
Hoppen·
vnd zoppen·
ze der stvben da wir vinden die·
[86v] Gesvngen·
gesprungen·
wirt da bas danne hie·
Schowen·
die frǒwe·
die helfent vns den reigen tretten·
wunder·
bisvnder·
kvmt ir dar vngebetten·
Gv̊te·
gv̊te·
mit vil hohem mv̊te·
gese·
gese·
darzv̊ angenese·
Gisel
ein risel·
hat si gemachet alse glanz·
Iútel·
ein bútel·
den bringet si an den tanz·
Hille·
vil stille·
dv́ kvmt geslichen zv̊ zvns dar·
Anne·
kvmt danne·
so gros so wirt dv́ schar·
Stolzen leigen also tv̊t·
singent dis gedoͤne·
Claren megde ir lant niht abe·
ir trettent an den ring·
Ie der man neme in den mv̊t·
sine frowen schoͤne·
Ieder dirnen wirt ein knabe
alsust ein ivngeling·
Lant den seiten·
vor bereiten·
wie man da palliere·
Swer niht langen·
mv́ge gedrangen·
der ge fúr die túr·
Nach der gigen·
sol er sigen·
swer es kvnde wieren·
Lâssa wichen·
er sol slichen·
schone in lobes kúr·
Erwinden
erwinden·
es wirt den kinden·
zelenge·
zelenge·
vnd ǒch zestrenge·
verirret·
verirret·
ist dc der seite erkirret·
Nv hoͤren·
nv hoͤren·
er wil vns ertoͤren·
Gesvngen
den ivngen·
het ich wol me wc hulfe dc·
Swer gerne·
in lerne·
dem gelinge deste bas·
Min herzen·
von smerzen·
wil mit dem seIten rehte enzwei·
des wuͤfet·
vnd ruͤfet·
es lute heia heý·