Nement war (Mit originalen Lettern)
[85v]
Nement war·
wie gar·
wc der meige vollen bꝛaht·
des wat·
zergat·
die der ſvm̾ hat erdaht·
der ſneit·
ſin kleit·
beide vf berge vn̄ in dem tal·
da ſanc·
erklanc·
der vil liebē nahtegal·
Aller ſoꝛgē fri·
vf gruͤnem zwi·
ir mv̊t·
wc gůt·
ze ſange ſnel·
Da bi wūnen ſpil·
ſi donde vil·
ir ſtimme dú was hel·
Vn̄ wc froͤiden vol·
ſi ſank ſo wol·
ir ſchal·
ergal·
al in dē walt·
kleiner vogelin dos·
der was ſo gros·
ſi waren froͤiden balt·
Jr ſingen·
kvnde bꝛingē·
der welte hohē mv̊t·
dú ǒwe·
mit tǒwe·
ſtat leider vnbehůt·
der anger·
niht langer·
mag blv̊mē nehte getragē·
Dú heide·
ſtet leide·
dc mv̊ſ ich lerchen klagen·
Dien kinden·
bi lindē·
der ſchatte iſt nv benomē·
Dien kvnne·
der wūnen·
nv leider niht bekomē·
Jr krenzel·
ir ſwenzel·
die warē ſo gemeit·
[86r] der winder·
hin hinder·
ſi twinget daſt mir leit·
Jch tvmber·
den kvmber·
liese ich wol alſo ſin·
Gebe húre·
mir ſtúre·
mī ſvͤſſe troͤſterin·
dú wendet·
vn̄ endet·
wol mines herzen not·
Nein ſvͤſſe·
dc buͤſſe·
mit dinem mvnde rot·
Din ſmieren·
kan zieren·
ſchone dich vil ſelig wib·
din lachen·
machē·
kan wol ſenden ſiechē man·
Din ǒgen
vil tǒgen·
kvnnē wol dvr gāzen lip·
Jn herzen·
ſmerzen·
fuͤgen frowe ſich daran·
Din ivgende·
mit tvgende·
hat ſo mīneklichen ſchin·
Jch kroͤne·
ſchoͤne·
dich fúr al des meien blv̊t·
Ach reine·
nv meine·
mich vil liebe frowe min·
vō leide
ſcheide·
troͤſte minē ſenden mv̊t·
Vn̄ tůſt dv dc·
deſwar ſo wirt mir bas·
vn̄ ſwindet min leit·
ſsit ich nie v̾gas·
ſwa man wibes gvͤte mas·
diner w̾dekeit·
Jch bin dir vndertan·
vn̄ da bi ſvnd̾ wan·
dir ze dienſte erboꝛn·
Dv ſolt genieſſē lan·
mich frowe dc ich han·
dich mir vs erkoꝛn·
voꝛ in allen·
gevallē·
mv̊s mir din wiblich ſin·
Nv ahte·
vn̄ trahte·
wie ich din eigē bin·
vn̄ laſſe·
die ſtraſſe·
mir noch ze wūne zemen·
Din ere·
vō ſere·
ſol mich ze froͤiden nemen·
Dú mīne·
mir ſinne·
enzvket mit vngewinne·
Eſt wūder·
beſvnder·
behabe ich den lip darvnder·
Vil ſvͤſſe·
dc buͤſſe·
e dc ich verderbē mv̊ſſe·
Jch ſtirbe·
v̾dirbe·
iſt dc ich niht heil erwirbe·
ſsus mv̊s ich in ſoꝛgē·
vil dike woꝛgen·
den abent den moꝛgē·
vn̄ ellú zit·
Dú liebe dú reine·
die ich da meine·
mir fuͤget den klagelichē ſtrit·
ach frǒwe gedenke·
die ſw̾e v̾krenke·
ſit ich niht wenke
mit diēſte vō dir·[WS 1]
Dvr wiplich ere
mir leit v̾kere·
mit fůge nah hovelich̾ gir·
ach frowe·
din ſchowe·
gelichet dē roſen in tǒwe·
din guͤte·
d̾ bluͤte·
des[WS 2] meigen vn̄ din gemvͤte·
Nement war·
gar·
dar·
wie mich dv́ ſchoͤne twinget ſwar ich var·
Min mv̊t·
gv̊t·
frůt·
wirt an mir ob ſi lobeliche tůt·
Jch ſinge·
ich ringe·
mit manigem dinge·
nach loneſ ſtat·
dur trúwe·
gip núwe·
mir[WS 3] froͤide der ich dich ie bat·
Nv lone·
mir ſchone·
dvr rehte wibes krone·
vn̄ wiſe·
mich liſe·
ze froͤiden ſit ich dich pꝛiſe·
Mit willen·
ſolt dv mir ſtillen·
die ſenden not vn̄ mine klage·
So wurde·
mir iamers burde·
geringet die ich da trage·
Mirſt ande·
dc dir ze pfande·
min h̾ze ſtet ſo lange her·
dc lâſſe·
nach mīnen mâſſe·
mir ledig daſt min ger·
Nv blike·
mir dike·
dc loͤſet die mīnen ſtrike·
Mit ǒgē·
vil tǒgē·
vn̄ troͤſte mich ſvnd̾ lǒgen·
dú ſīt ſo clare·
dc ſpꝛich ich zeware·
vil offēbare·
vn̄ iſt wol ſchin·
Din lieht antlútze·
fúr truren nv̊tze·
dc iſt an dem gelǒben min·
Din mvnt nach roſen·
gevar kan koſen·
wol ſvnder loſen·
der tvgende woꝛt·
nv gruͤſſe·
mich ſuͤſſe·
mit ſvͤſſem gruͤſſe·
ſo vinde ich miner froͤiden hoꝛt·
Swer wūne·
kvnne·
rehte ſpehen·
an wibe·
libe·
vn̄ ǒch ir mv̊t·
Jr zuhte·
túhte·
mv̊s ir iehen·
voꝛ ſchanden·
bandē·
ſi iſt wol behv̊t·
Mit klv̊gen·
fůgen·
ſi iſt erzogen·
nach eren·
leren·
tvgende rich·
Jr wirde·
girde·
iſt vmbetrǒgen·
ir mīne·
ſinne·
hat ſi zúhteklich·
Lop kan ſi v̾ſchulden wol·
da vō man ir ſpꝛechē ſol·
ſi iſt tvgendē vol·
dú reine fruht·
Ach ſi iſt ſo rehte gv̊t·
doch beſw̾et ſi mir den mv̊t·
dú froͤide hat vō mir fluht·
Minne ſuͤſſe troͤſterin·
tů mir diner helfe ſchin·
alder ich bin tot·
Twinc die lieben alſe mich·
oder es wirt[WS 4] vngemenlich·
ich lebe in ſender not·
Mich krenket·
v̾ſenket·
ſwie mīne min niht gedenket·
E· liebe
zerkliebe·
min h̾ze gar zerſtiebe·
Jch bin v̾ſeret·
dú soꝛge· mir meret·
gedinge ſi keret
der froͤiden hin dan[WS 5]·
wil mīne v̾leiten·
mit arebeiten·
mich alſo froͤideloſen man·
Jch han nv lange·
mit minem geſange·
der froͤiden gedꝛange·
gevolget nach·
Deſ iſt dv́ mīne·
min meiſt̾inne·
vn̄ iſt ir vō mir gach·
Nv ſingen·
nv ſingen·
dannoh harte erſpringen·
Den reigen·
den reigen·
pfaffen vn̄ leigen·
Nv lâſſe·
nv lâſſe·
vnſ reigen an der ſtraſſe·
die rifen·
die rifen·
die went vns hie begrifen·
Hoppen·
vn̄ zoppen·
ze der ſtvbē da wir vinden die·
[86v] Geſvngen·
geſpꝛungē·
wirt da bas danne hie·
ſschowen·
die frǒwe·
die helfēt vns den reigen trettē·
wunder·
biſvnd̾·
kvmt ir dar vngebettē·
Gv̊te·
gv̊te·
mit vil hohem mv̊te·
geſe·
geſe·
darzv̊ angeneſe·
Giſel
ein riſel·
hat ſi gemachet alse glanz·
Jútel·
ein bútel·
den bꝛinget ſi an den tanz·
Hille·
vil ſtille·
dv́ kvmt geſlichen zv̊ zvns dar·
Anne·
kvmt danne·
ſo gros ſo wirt dv́ ſchar·
ſstolzen leigē alſo tv̊t·
ſingēt diſ gedoͤne·
Clarē megde ir lant niht abe·
ir trettent an den ring·
Je der man neme in den mv̊t·
ſine frowen ſchoͤne·
Jeder dirnen wirt ein knabe
alſuſt ein ivngeling·
Lant den ſeitē·
voꝛ bereiten·
wie man da palliere·
Sw̾ niht langē·
mv́ge gedꝛangē·
der ge fúr die túr·
Nach der gigē·
ſol er ſigē·
ſw̾ es kvnde wieren·
Lâſſa wichē·
er ſol ſlichen·
ſchone in lobes kúr·
Erwindē
erwīden·
es wirt den kinden·
zelenge·
zelēge·
vn̄ ǒch zeſtrenge·
verirret·
v̾irret·
iſt dc der ſeite erkirret·
Nv hoͤꝛen·
nv hoͤrē·
er wil vns ertoͤꝛen·
Geſvngē
den ivngen·
het ich wol me wc hulfe dc·
ſSwer gerne·
in lerne·
dem gelinge deſte bas·
Min h̾zen·
von ſmerzē·
wil mit dē ſeItē rehte enzwei·
des wuͤfet·
vn̄ ruͤfet·
es lute heia heý·