Nieman ist ein selig man

Nieman ist ein selig man·
ze dirre werlte wan der eine·
der nie liebes teil gewan·
vnd ǒch dar nach gedenket kleine·
des herze ist vri von sender not·
dú manigen bringet vf den tot·
der schone heil gedienet hat·
vnd sich des ane mv̊s began·
dem libe niht so nahe gat·
als ich mich leides wol entstan·
wand ich den selben kvmb̾ han·

Es ist ein vngelúkes grůs·
der get fúr aller hande swere·
dc ich von frúnden scheiden mv̊s·
bi den ich iemer gerne were·
dú not von minen trúwen kvmt·
ich en weis ob si der sele iht frumt·
sine git dem libe lones me·
wan truren den vil langen tac·
mir tůt min stete dike we·
wand ich mih niht getroͤsten mac·
der gv̊ten dú mich schoͤne pflag·