Nv git aber der suͤsse meie

Nv git aber der suͤsse meie·
selde vnd ere maniger leie·
blv̊men rot gel vnd blanc·
dur dc gruͤne gras vf dringent·
da bi kleine vogel^{[WS 1]} singent·
also froͤiderichen sanc·
dc dú heide erkrachet·
vnd der wunnekliche walt·
vs dem swarzen dorne lachet·
wîsse blůt vil manicvalt·

Wol dem manne der mit wibe·
disen svmer so vertribe·
dc er liebes wirt gewert·
heý wie dem sin leit verswindet·
wand er nach dem wunsche vindet·
alles des sin herze gert·
reiner wibe guͤte·
bc dan al des meien blv̊t·
froͤwet mannes gemvͤte·
wan si sint fúr truren gv̊t·

Swer sin herze welle entstricken^{[WS 2]}·
vs den sorgen der sol bliken·
an dú reinen gv̊ten wib·
vinde er da niht selde vnd ere·
sone gesv̊che niemer mere·
froͤide an keiner stat sin lip·
wib sint ane lǒgen·
bernder wunne ein meien ris·
es lit vnder wibes ǒgen·
aller froͤiden paradýs·

Anmerkungen (Wikisource)

1. Vorlage: kleinú vogelú.
2. Vorlage: entſtrichē.