Nv hat ſich d̾ ſum̾ mit vil manig̾ hande kleide

Nv hat ſich d̾ ſum̾ mit vil manig̾ hande kleide·
wol gezieret ſchǒwēt an dē ang̾ lieht gevar·
lute ſingēt vogel ī walde vn̄ vf d̾ gruͤnē heide·
manig h̾ze iſt von der wūne woꝛdē ſoꝛgē bar·
wc tǒg mir vúr leid des meijē bluͤte·
dc ich lāge trage· es wēde d̾ vil reinē guͤte·
Owe lieb geſchehe dc mir wurde bas·

Troſt vō d̾ vil gůtē wēne ſol ich dē enpfahē·
lieb vō der vil liebē het ich g̾ne· es w̾e wol zit·
wil ſi minē dienſt alſo veſtēklich v̾ſmahē·
wc mir dāne kvmb̾lich̾ ſoꝛge ī h̾zē lit·
neina wúnſchēt alle dc dv́ mīne·
mir geliche twīge· ir h̾ze ir mv̊t vn̄ al ir ſinne·
Owe liep geſchehe dc mir wurde bas·^{[WS 1]}

Han ich ir gedienet tǒgēliche h̾ vo kīde·
we wes ſivndet ſich dú h̾zeliebe dāne an mir·
hie bi voꝛ wc ich vil bas d̾ froͤidē īgeſinde·
do lies mich dú mīne lebē nach mines h̾zē gir·
mir mag lieb lieblich ende machē·
troſte mich ein heinlich grůs ein wīken vn̄ ein lachē·
Owe liep geſchehe dc mir wurde bas·
·^{[WS 2]}

Werdē māne ir ſūt dē tvgētrichē reinē wibē·
vf genade in dienſte g̾ne weſen vnd̾tan·
niemā kan dē lútē noch der w̾lte vꝛo belibē·
wā von liebeſ troſte deſ ſichs rehte wil entſtan·
nv iſt min troſt vō der vil liebē kleine·
dc mag ſi mir wēdē wol dú mīneklich alleine·
Owe liep geſchehe dc mir wurde bas·^{[WS 3]}

Minnekliches lachē wūneklich̾ ǒgē blike·
bꝛvne bꝛawe liehte varwe vf wēgel mv́ndel rot·
hat ein wib dú fuͤget minē kvmb̾ alſo dike·
dc ich lide iamerſ pin vn̄ da bi ſende not·
ach genade frowe ich bin din eigē·
dú ſolt mir nach ſend̾^{[WS 4]} ein froͤidelin erzeigē·
Owe liep geſchehe dc mir wurde bas·
·^{[WS 5]}

Anmerkungen (Wikisource)

1. Vorlage: Owe liep·
2. Vorlage: Owe liep·
3. Vorlage: Owe liep·
4. Ein Wort, pîn oder nôt, fehlt.
5. Vorlage: Owe liep·