Nv hat sich der sumer mit vil maniger hande kleide

Nv hat sich der sumer mit vil maniger hande kleide·
wol gezieret schǒwent an den anger lieht gevar·
lute singent vogel in walde vnd vf der gruͤnen heide·
manig herze ist von der wunne worden sorgen bar·
wc tǒg mir vúr leid des meijen bluͤte·
dc ich lange trage· es wende der vil reinen guͤte·
Owe lieb geschehe dc mir wurde bas·

Trost von der vil gůten wenne sol ich den enpfahen·
lieb von der vil lieben het ich gerne· es were wol zit·
wil si minen dienst also vestenklich versmahen·
wc mir danne kvmberlicher sorge in herzen lit·
neina wúnschent alle dc dv́ minne·
mir geliche twinge· ir herze ir mv̊t vnd al ir sinne·
Owe liep geschehe dc mir wurde bas·^{[WS 1]}

Han ich ir gedienet tǒgenliche her vo kinde·
we wes sivndet sich dú herzeliebe danne an mir·
hie bi vor wc ich vil bas der froͤiden ingesinde·
do lies mich dú minne leben nach mines herzen gir·
mir mag lieb lieblich ende machen·
troste mich ein heinlich grůs ein winken vnd ein lachen·
Owe liep geschehe dc mir wurde bas·
·^{[WS 2]}

Werden manne ir sunt den tvgentrichen reinen wiben·
vf genade in dienste gerne wesen vndertan·
nieman kan den lúten noch der werlte vro beliben·
wan von liebes troste des sichs rehte wil entstan·
nv ist min trost von der vil lieben kleine·
dc mag si mir wenden wol dú minneklich alleine·
Owe liep geschehe dc mir wurde bas·^{[WS 3]}

Minnekliches lachen wunneklicher ǒgen blike·
brvne brawe liehte varwe vf wengel mv́ndel rot·
hat ein wib dú fuͤget minen kvmber also dike·
dc ich lide iamers pin vnd da bi sende not·
ach genade frowe ich bin din eigen·
dú solt mir nach sender^{[WS 4]} ein froͤidelin erzeigen·
Owe liep geschehe dc mir wurde bas·
·^{[WS 5]}

Anmerkungen (Wikisource)

1. Vorlage: Owe liep·
2. Vorlage: Owe liep·
3. Vorlage: Owe liep·
4. Ein Wort, pîn oder nôt, fehlt.
5. Vorlage: Owe liep·