Owe was eren sich ellendet von tútschen landen

Owe was eren sich ellendet von tútschen landen·
witze vnd manheit dar zv̊ silber vnd golt·
swer dv́ beidú hat der belibet mit schanden·
wie den vergat des himelschen keisers solt·
dem sint die engel noch die frowen holt·
arm man ze der welte vnd wider got·
wie der fúrhten mac ir beider spot·

Es kvmt ein wint dc wissent sicherliche·
da von wir hoͤren beide singen vnd sagen·
der sol mit grimme ervarn ellú kv́nigriche·
dc hoͤre ich waller vnd pilgerine klagen·
bǒme túrne ligent vor im zerslagen·
starken lúten weiet er dv́ hǒbet abe·
nv svln wir fliehen hin zegottes grabe·

Owe wir mvͤssigen lúte wie sin wir versessen·
zwischen zwein froͤiden nider an die iamerlichen stat·
aller arbeit heten wir vergessen·
do vns der kvrze svmer sin gesinde wesen bat·
der brahte vns varnde blv̊men vnd blat·
do trǒg vns der kvrze vogel sanc·
wol im der ie nah steten froͤiden ranc·

We geschehe der wise die wir mit den grillen svngen·
do wir vns solten warnen gegen des kalten winters zit·
dc wir vil tvmben mit der ameissen niht rungen·
dv́ nv vil werdekliche bi ir arbeiten lit·
dc wc ie der welte strit·
tôrn schvlten ie der wisen rat·
wan siht wol dort swer hie gelǒgen hat·