Si wunder wol gemachet wib (Mit aufgelösten Abbreviaturen)

Si wunder wol gemachet wib·
dc mir noh werde ein habedanc·
ich setze ir minneklichen lib·
vil hohe in minen werden sanc·
gerne ich allen diener sol·
doch han ich mir dise vserkorn·
ein ander weis die sinen wol·
die lob er ane minen zorn·
hab im wise vnd wort·
mit mir gemeine lob ich hie so lob er dort·

IR hǒbet ist so wunnen rich·
als es min himel welle sin·
wem moͤhte es anders sin gelich·
es hat ǒch himeleschen schin·
da lúhtent zwene sternen abe·
da mvͤsse ich mich noch inne ersehen·
das si mirs also nahe habe·
so mac ein wunder wol geschehen·
ich ivnge vnd tůt si das·
vnd wirt mir gernden siechen senender súhte bas·


IR kel ir hende ietweder fůs·
dc ist zewunsche wol getan·
ob ich da enzwischen loben mv̊s·
ich wenne ich nie beschowet han·
ich hete vngerne deke blos·
gerǒfet do ich si nakent sach·
si sach mich niht swie si mich schos·
dc mich noch stichet als es stach·
swanne ich der lieben stat·
gedenke da si vs einen reinen bade trat·

Got hat ir wengel hohen flis·
er streich so túre varwe dar·
so reine rot so reine wis·
da roͤseloht da lilien var·
ob ichs getar von svnden sagen·
ich sehe si iemer gerner an·
danne alle himel oder himel wagen·
owe wc lob ich tvmber man·
mache ich mir si zeher·
vil lihte wirt mines herzen lob mins herzen ser·

Si hat ein kv́ssen dc ist rot·
gewunne ich dc fúr minen mvnt·
so stuͤnde ich vf von dirre not·
vnd wer ǒch iemer me gesvnt·
swa si dc an ir wengel leget·
da wer ich gerne nahe bi·
es smeket so mans iender reget·
als es volles balsemen si·
dc sol si lihen mir·
swie dike sis hin wider wil so gibe ichs ir·