Topographia Saxoniae Inferioris:Acken

Acken / Acona, Aca.

Es schreibet D. Mattheus Dresserus seinem Stätt-Buch / pag. 106. seq. daß Acken von den Niederländern also genant worden / welche Herzog Heinrich der Löw / zu Sachsen / vnnd Marckgraff Albrecht/ der Beer / zu Brandeburg / nach Vertreibung der Wenden / an die Elb / dabey diese Statt liget / gesetzt; vnd daß Hertzog Bernhards zu Sachsen / auß dem Anhaltischen Stammen / Nachkommen / solche Statt erstlich beherrschet haben; folgends seye sie An. 1277. von den Hertzogen von Sachsen / dem Ertzbischoff Conrado von Magdeburg / mit Staßfurt / vnd etlichen Schlössern / vmb eine Summa Gelts / versetzt worden; nach dessen todt solche Stätt / vnd Schlösser / von dem Stifft / wieder an die Fürsten gefallen; die der Ertzbischoff Günther ihme zu restituiren begehrt / vnd / auff dessen Versag / den Fürst Rudolffen mit Marckgraff Otten zu Brandeburg / vnnd etlichen Graven / vnversehens mit Krieg angegriffen / geschlagen / vnnd den Marckgraven gefangen: Aber An. 1279. seye Albertus II. Hertzog zu Sachsen / heimlich in die Statt Acken kommen / vnd habe solche dem Ertzbischoff wieder genommen; der gleichwol den Hertzogen mit Gewalt auß der Statt gejagt habe. Als nun dieselbe hin vnd wieder gerathen / seye sie endlich Anno 1385. dem Stifft Magdeburg wieder heimkommen. Johannes Pomarius, in seiner Magdeburgischen Statt-Chronic sagt/ daß vnter dem 24. Ertz-Bischoff Gunthero, die von Magdeburg / mit ihrem Beystand / Aken eingenommen; welche / mit dem Schloß Glentorff / sich vom Stifft abgewandt / vnnd zum Churfürsten zu Sachsen begeben hatte. Sihe von den gedachten Kriegen vmb die Statt Aken / auch die Braunschweigische Chronick / welche in diesem Werck offt angezogen wird / vnnd die erstlich Heinrich Bunting abgefasset / vnnd hernach Heinrich Meybaum / oder Meibomius, Professor bey der hohen Schul zu Helmstatt / mercklich gebessert / vermehret / vnd biß auff das 1620. Jahr / außgeführet hat. Welches dann allhie / bey der ersten Statt / zu melden gewesen / damit künfftig solches so offt nicht zu wiederholen seye. Andreas Angelus in seiner Märckischen Chronick vermeynt / daß Acken vom König Benno seye erbawet worden. Aber es gehört ein mehrer Beweiß darzu. Also gibt Cyriacus Spangenberg / in seiner Schaumburgischen Chronick / libro 2. capite 6. Statt / vnnd Schloß / den Fürsten von Anhalt: Aber Melchias Nehel / in Erklärung deß Ertz-Stiffs Magdeburg / schreibet im Jahr 1641. diesen Ort noch dem gemelten Stifft zu. Anno 1642. ward allhie anderthalb Meilen oberhalb Barby / die Käyserische Schiffbrucke geschlagen / darüber die Bäyerischen / den dritten Martij gezogen seyn / vnnd das erste Nachtläger zu Köthen genommen haben / als sie / dem Ertzstifft Cölln zum besten / abgefordert worden. Was sonsten allda / in dem nächsten Teutschen Krieg / vorgeloffen; davon ermangelt ein mehrer / vnd gewisser Bericht.