Uerholnú minne sanfte tůt

Uerholnú minne sanfte tůt·
do sang ein wahter an der zinne·
doch sol sich lieb von liebe scheiden·
dar nach so wende er sinen mv̊t·
ist ieman tǒgenlich hinne·
deswar so tůt er wol in beiden·
er sol^{[WS 1]} sorgen·
wie er von hinnen kere·
est an den morgen
volge er miner lere·
sit dc ich in warnen sol·
so tůt er wol
vnd sint sin ere·

Der frowen dienerinne klůg·
erhorte da des wahters singen·
dar inne erschrak dv́ vil getrúwe·
dú mêr si hin ze der frowen trůg·
si sprach wol vf vnd lânt ú lingen·
der tag ist komme da hv̊b sich rúwe·
est âne súnde
sprach dú tvgentriche·
der in so súnde
ligen minnekliche·
erst entslafen nv sich hie
in weis niht wie
ich entwiche·

Die rede erhorte der werde gast·
da er lag bi der minneklichen·
bi liebes brust an blanken armen·
da von in slafes do gebrast·
er sprach sol ich von hinnan strichen·
owe das mvͤs got erbarmen·
beider sinne·
wurden da v́seret·
dc schůf fro minne·
froͤide gar verkeret·
da schied leid der wunnen spil·
der trehene vil·
wart da gereret·

Anmerkungen (Wikisource)

1. Vorlage: ſol ſol.