Uf lieben wan (Mit aufgelösten Abbreviaturen)

UF lieben wan·
ich alles gan·
der schonen vnder ǒgen·
An allen wank·
ist min gedank·
bi ir dast ane lǒgen·

Nv dinge ich doch·
dc si mir noch·
genade welle erzǒgen·
vnd wurde mir·
ein grůs von ir·
mit minnebliken tǒgen·

Seht so wurde·
iamers bvrde·
von mir also gar veriagt·
das ich tvmber
minen kvmber·
hete vil schiere da von verklagt·

Frowe minne·
twinge ir sinne·
vnd ir herze dc si mir·
Mit ir willen·
mvͤsse stillen·
sende not die ich han von ir·

Ich han·
den wan·
der mich niht lat·
von dir
tuo mir·
nv selhen rat·

dc mine
pine·
wider dich·
vnd herzen·
smerzen·
enden sich·

Frowe din lachen·
dc mehte mir machen·
der froͤiden vil swachen·
die not·
von der ich wachen·
mv̊s dike dien sachen·
da von min herze mv̊s krachen·
der tot·

were lihte·
ob ich die bihte·
hete getan mir besser noch vil·
danne ich were·
lange in swere·
vnd ich niht kvnde wissen dc zil·

Wande ich lange·
leitlich blange·
darzv̊ súftebernde klage·
Solden miden·
ich mv̊s liden·
disen kvmb alle tage·

Nv wol·
ich sol·
vil gerne han·
dur dich·
swas mich·
mag not bestan·

Nieman kan min gemv̊te·
so gar betwingen·
kúniginne·
hilf dar inne·
minem sinne·
E dc ich tvmber wuͤte·
la mir gelingen·
troͤsterinne·
sit ich brinne·
in diner minne·

Als in der gluͤte·
ich mich verbruͤte·
wil mir niht din roter mvnt·
vnd ǒch din guͤte·
die got behuͤte·
tv̊n ein lieplich kv́ssen kunt·

So ist min swere·
klagebere·
minen frúnden vnd ǒch mir·
Ich mv̊s sterben·
ald erwerben·
froͤideberndes heil an ir·

Tůt si
mich fri·
vor selher not·
dc ist
ein list·
mir fúr den tot·

Vil suͤsse·
buͤsse·
mir den pin·
dv solt·
mir holt
von schulden sin·

wan ich dich meine·
vil suͤsse reine·
mit trúwen froͤide erscheine·
dv mir·
Dc ich alleine·
die swere iht beweine·
min wille der ist niht kleine·
gegen dir·

Da von kere·
dvr din erê·
mir zegv̊te minen sanc·
Wil din hvlde·
min vnschulde·
erkennen so ist min truren krank·

Frowe ich kroͤne·
dine schoͤne·
svnderbar fúr ellú wib·
Vor in allen·
mv̊s gevallen·
mir din minneklicher lip·

Nemt war·
wie gar·
ir kúscher mv̊t·
Vor schanden
banden
ist behv̊t·

Si hat·
den rat·
der froͤide birt·
swie er
mir her^{[WS 1]}
nach kvme wirt·

Da von truret·
vnd svret·
mir der mv̊t vnd ǒch dc leben·
Ivnge vnd alde·
erteilent balde·
ob si mir helfe svle geben·

die frechen·
sprechen·
alle ia·
Des war·
min har·
wirt anders gra·

Anmerkungen (Wikisource)

1. Vorlage: har.