Uf lieben wan (Mit originalen Lettern)

UF lieben wan·
ich alles gan·
der ſchonen vnder ǒgen·
An allen wank·
iſt min gedank·
bi ir daſt ane lǒgen·

Nv dinge ich doch·
dc ſi mir noch·
genade welle erzǒgen·
vn̄ wurde mir·
ein grůs vō ir·
mit mīnebliken tǒgen·

Seht ſo wurde·
iamers bvrde·
vō mir alſo gar v̾iagt·
das ich tvmber
minen kvmber·
hete vil ſchiere da vō v̾klagt·

Frowe mīne·
twinge ir ſinne·
vn̄ ir h̾ze dc ſi mir·
Mit ir willen·
mvͤſſe ſtillen·
ſende not die ich han vō ir·

Jch han·
den wan·
der mich niht lat·
vō dir
tuo mir·
nv ſelhē rat·

dc mine
pine·
wider dich·
vn̄ h̾zen·
ſmerzen·
enden ſich·

Frowe din lachen·
dc mehte mir machen·
der froͤidē vil ſwachen·
die not·
von der ich wachen·
mv̊s dike dien ſachē·
da vō min h̾ze mv̊ſ krachen·
der tot·

were lihte·
ob ich die bihte·
hete getan mir beſſer noch vil·
dāne ich were·
lange in ſwere·
vn̄ ich niht kvnde wiſſen dc zil·

Wande ich lange·
leitlich blange·
darzv̊ ſúfteb̾nde klage·
Soldē miden·
ich mv̊s liden·
diſen kvmb alle tage·

Nv wol·
ich ſol·
vil gerne han·
dur dich·
ſwas mich·
mag not beſtan·

Nieman kan min gemv̊te·
ſo gar betwingen·
kúniginne·
hilf dar inne·
minem ſinne·
E dc ich tvmber wuͤte·
la mir gelingē·
troͤſterinne·
ſit ich bꝛinne·
in diner minne·

Als in der gluͤte·
ich mich v̾bꝛuͤte·
wil mir niht din rot̾ mvnt·
vn̄ ǒch din guͤte·
die got behuͤte·
tv̊n ein lieplich kv́ſſen kunt·

So iſt min ſwere·
klagebere·
minen frúndē vn̄ ǒch mir·
Jch mv̊s ſterbē·
ald erw̾bē·
froͤideberndes heil an ir·

Tůt ſi
mich fri·
voꝛ ſelher not·
dc iſt
ein liſt·
mir fúr dē tot·

Vil ſuͤſſe·
buͤſſe·
mir den pin·
dv ſolt·
mir holt
vō ſchulden ſin·

wan ich dich meine·
vil ſuͤſſe reine·
mit trúwē froͤide erſcheine·
dv mir·
Dc ich alleine·
die ſwere iht beweine·
min wille d̾ iſt niht kleine·
gegen dir·

Da vō kere·
dvr din erê·
mir zegv̊te minē ſanc·
Wil din hvlde·
min vnſchulde·
erkennē ſo iſt min truren krank·

Frowe ich kroͤne·
dine ſchoͤne·
ſvnderbar fúr ellú wib·
Voꝛ in allen·
mv̊s gevallen·
mir din minneklicher lip·

Nemt war·
wie gar·
ir kúſcher mv̊t·
Voꝛ ſchanden
bandē
iſt behv̊t·

Si hat·
dē rat·
der froͤide birt·
ſwie er
mir her^{[WS 1]}
nach kvme wirt·

Da vō truret·
vn̄ ſvret·
mir der mv̊t vn̄ ǒch dc leben·
Jvnge vn̄ alde·
erteilent balde·
ob ſi mir helfe ſvle gebē·

die frechen·
ſpꝛechē·
alle ia·
Des war·
min har·
wirt anders gra·

Anmerkungen (Wikisource)

1. Vorlage: har.