Vil svͤsse were minne

aus Wikisource, der freien Quellensammlung
Zur Navigation springen Zur Suche springen
Textdaten
Autor: Walther von der Vogelweide
Illustrator: {{{ILLUSTRATOR}}}
Titel: Vil svͤsse were minne
Untertitel:
aus: UB Heidelberg 136r und UB Heidelberg 136v
Herausgeber:
Auflage:
Entstehungsdatum: 12. Jahrhundert
Erscheinungsdatum: Vorlage:none
Verlag: Vorlage:none
Drucker: {{{DRUCKER}}}
Erscheinungsort:
Übersetzer:
Originaltitel:
Originalsubtitel:
Originalherkunft:
Quelle: UB Heidelberg und UB Heidelberg
Kurzbeschreibung:
Mit aufgelösten Lettern. Vergleiche auch Vil ſvͤſſe were mīne in Originallettern.
Wikipedia-logo-v2.svg Artikel in der Wikipedia
Eintrag in der GND: {{{GND}}}
Bild
[[Bild:|250px]]
Bearbeitungsstand
korrigiert
Dieser Text wurde anhand der angegebenen Quelle einmal Korrektur gelesen. Die Schreibweise sollte dem Originaltext folgen. Es ist noch ein weiterer Korrekturdurchgang nötig.
Um eine Seite zu bearbeiten, brauchst du nur auf die entsprechende [Seitenzahl] zu klicken. Weitere Informationen findest du hier: Hilfe
[[index:|Indexseite]]

[136r]

Vil svͤsse were minne·
berihte kranke sinne·
got dvrh din anebeginne·
bewar die kristenheit·
din kvnft ist fronebêre·
vber vf der welde swere·
der weisen barmenere·
hilf rechen disú leit·
loͤset vs den sv́nden·
wir gern ze den swebenden v́nden·
vns mac din geist enzúnden·
wirt rúwig herze erkant·
din blv̊t hat vns begossen·
den himel vf geslossen·
nv loͤset vnuerdrossen·
dc herebernde lant·
verzinset lib vnd eigen·
got sol vns helfe erzeigen·
vf den der manigen veigen·
der sele hat gepfant·

Dis kurze leben verswindet·
der tot vns súndig vindet·
swer sich ze gote gesindet·
der mac der helle engan·
bi swere ist genade fvnden·
nv heilent kristes wunden·
sin lant wirt schiere enbvnden·
dest sicher svnder wan·
kv́nigen ob allen frowen·
la werende helfe schowen·
din kint wart dort verhowen·
sin menscheit sich ergab·
sin geist mvͤsse vns gefristen·
das wir die diet verlisten·
der tǒf si seit vnkristen·
wan fúrhtent si den stab·
der ǒch die ivden villet·
ir schrien lvt erhillet·
manic lob dem krúze erschillet·
erloͤsen wir das grab·

Dú menscheit mv̊s verderben·
svln wir den lon erwerben·
got wolde dvr vns sterben·
sin dro ist vf gespart·
sin kruͤze vil geheret·
hat maniges teil gemeret·
swer sich von zwiuel keret·
der hat den geist bewart·
sv́ndic lib vergessen·
dir sint dú iar gemessen·
der tot hat vns besessen·
die veigen ane wer·
nv hellent hin geliche·
dc wir das himelriche·
erwerben sicherliche·
bi dvldeklicher zer·
got wil mit heldes handen·
dort rechen sinen anden·
sich schar von manigen [136v] landen·
den heilegestes her·

Got din helfe vns sende·
mit diner zeswen hende·
bewar vns an dem ende·
so vns der geist verlat·
vor helle heissen wallen·
dc wir dar in iht vallen·
es ist wol kunt vns allen·
wie iamerlich es stat·
dc here lant vil reine·
gar helfelos vnd eine·
ierusalem nv weine·
wie din vgessen ist·
der heiden vber here·
hat dich verschelket sere·
dvr diner namen ere·
la dich erbarmen krist·
mit welher not si ringen·
die dort den borgen dingen·
dc si vns also betwingen·
dc wende in kvrzer frist·