Wafen vber die schande si geschriêt· dú vil eren vriet
[389r]
Wafen vber die schande si geschriêt· dú vil eren vriet·
alter vnd ivgent·
genv̊ge milte weren· ob die lasterberen·
niht zespotte brehten si mit schalle·
der siht man so vil vf allen strâssen· dc dvrh si mv̊s lassen·
maniger sine tvgent·
der nv fúrhtet sere· das man im verkere·
dc er lebe niht als die boͤsen alle·
der kargen manicvaltekeit stroͤret richer selden hort·
wil ieman zeherzen tvgende zvken· die mv̊s er verdrvken·
reht als einen mort·
vor den aller boͤsten· durh dc er der groͤsten·
vnd der meisten menge wol gevalle·
Wer aber ich ein herre vries mv̊tes· so wolt ich des gv̊tes
deste milter sin·
dc man vindet húte· me geschanter lúte·
danne gerter lebe in disen ziten·
trúwe vnd ere glentzent deste vaster· dc mein vnd laster·
gebent so truͤben schin·
ob die lúte vmbe ere· wurben alle sere·
wie moͤhte ieman danne lob erstriten·
dc arge bi dem gv̊ten erger vnd boͤser lúhten kan·
vnd dc gůte besser bi dem argen· da von ûz[WS 1] den kargen·
tvgendericher man·
kan vil schines bringen· als ûz[WS 2] kiselingen·
schone glissent edele margariten·