Was solte ich arges von ir sagen

Was solte ich arges von ir sagen·
der ich ie wol gesprochen han·
ich mac wol minen kvmber klagen·
vnd si dar vnder vngeflehet lan·
si nimt von mir fúr war·
minen dienst manic iar·
ich han gegert
ir minne vnd vinde ir has
dc mir da nie gelanc·
des habe ich selbe vndanc·
duhte ich si sin wert
si hete mir gelonet bc·

Ich sprach ich wolte ir iemer leben·
dc lies ich wite mere komen·
min herze het ich ir gegeben·
dc han ich nv von ir genomen·
swer tumben antheis trage·
[der laz in der tage]
ê in der strit
berǒbe siner iare gar·
also han ich getan·
der krieg si ir verlan·
fúr dise zit
wil ich dienen ander swar·

Ich was vngetrúwen ie gehas·
nv wolte ich vngetrivwe sin·
mir tete vntrúwe verre bas·
danne dc mich dú trúwe min·
von ir niht scheiden lies·
dú mich ir dienen hies·
nv tůt mir we
si wil mir vn gelonet lan·
ich spriche ir núwan gůt·
e ich beswere ir mv̊t·
so wil ich e
die schvlde zv̊ dem schaden han·

Der ich da her gedienet han·
dur die wil ich mit froͤiden sin·
doh es mich wenig hat veruan·
ich weis wol dc dv́ frowe min·
nach eren lebet·
swer von der siner strebet·
der habe im dc
in betraget siner iare vil·
swer also minnen kan·
der ist ein valscher man·
min mv̊t stet bas·
von ir ich niemer komen wil·

Sit ich ir lones mv̊s enbern·
der ich manig iar gedienet han·
so gerůche mich got eines wern·
dc es der schonen mvͤsse ergan·
nach eren vnd wol·
sit ich mich rechen sol·
deswar dc si
vnd doch niht anders wan also·
dc ich ir wol heiles gan·
vnd bc danne ein ander man·
vnd bin dabi
ir leides gram ir liebes fro·

Mir sint dú iar vil vnuerlorn·
dú ich an si gewendet han·
hat mich ir minnen lon verborn·
doch troͤstet mich ein lieber wan·
ich gerte nihtes me·
wan mvͤse ich ir als ê·
zefrowen iehen·
menig man nimt sin ende also·
dc im niemer gv̊t geschiht·
wan das er sich versiht·
dc es svle geschehen·
vnd tůt in der gedinge fro·