Wer adellichen tůt den wil ich han fv́r edel (Mit aufgelösten Abbreviaturen)

Wer adellichen tůt den wil ich han fv́r edel·
wie man sis adels achtet nicht gen eim ze edel·
nv sicht man doch bekomen rosen von dem torne·
wa sich mischet vil vntugenden zv̊ dem adel·
da mag das adel kleit wol werden ze einem hadel·
nicht gůt dem mel· da vil getreffes ist vnder korne^{[WS 1]}·
wa adel adellicher tat·
der adel lv́tert immr·
wa adel arkeit vil begat·
verhǒwet gůt gezimber·
wer nicht si von hohem namen·
vnd sich vntugeden welle schamen·
dar zv̊ sin ding zv̊ dem besten kan gezamen·
den heis ich edel wie er nicht si von adel der geborgen·

Kein besser latwerie nie gemachet wart·
als ich lêr vnd kv́nde· von sinneklicher art·
gesvnt ze laster wunden vnd ze schanden súchten·
Mit fv́nf bimenten rein sol si gemenget sin·
trúwe vnd zucht milti vnd manheit hoͤrt dar in·
da bi sol maset búlvern smeken vnd trúchten·
dise latwerie ist er genant
ein bals ob allen spisen·
mit ir wirt schanden not entrant·
si zimt nicht dem vnwisen·
wem si wont stete bi·
der ist vor hǒbt schanden vri·
wol an des lip· der latwerien bv́chse si·
in reines lop sin hoher nam· wirt bloͤien vnd frúhten·

Wenne ich gedenke was ich was ald was ich bin·
ald was ich werden můs· so ist alle min froͤide da hin·
vnd wie die tag mis lebendes lǒffen· von mir swinde·
vnd ist das nicht ein iamer súfzen bernde not·
das ich von tag ze tage můs fúrhten den tot·
wie er mich bringe in der vnreinen wúrmen gesinde·
wie solt ich da bi vro gesin·
so ich das als betrachte·
so han ich an dem herzen min·
michel grosser achte·
wie das min sel dort kvmber dol·
mit sv́nden was mir ê· so wol·
almechtig herre dú bist alser gnaden vol·
hilf mir das min sel doͤrt vor dir gnade vinde

Anmerkungen (Wikisource)

1. Vorlage: koꝛn.