Wer adellichen tůt den wil ich han fv́r edel (Mit originalen Lettern)

Wer adellichen tůt den wil ich han fv́r edel·
wie man ſis adels achtet nicht gen eim ze edel·
nv ſicht man doch bekomen roſen vō dem toꝛne·
wa ſich miſchet vil vntugenden zv̊ dem adel·
da mag das adel kleit wol werden ze einem hadel·
nicht gůt dem mel· da vil getreffes iſt vnder koꝛne^{[WS 1]}·
wa adel adellicher tat·
der adel lv́tert immr·
wa adel arkeit vil begat·
verhǒwet gůt gezimb̾·
wer nicht ſi vō hohem namē·
vn̄ ſich vntugeden welle ſchamē·
dar zv̊ ſin ding zv̊ dem beſten kan gezamē·
den heis ich edel wie er nicht ſi vō adel der geboꝛgen·

Kein beſſer latwerie nie gemachet wart·
als ich lêr vn̄ kv́nde· vō ſinneklicher art·
geſvnt ze laſter wundē vn̄ ze ſchanden ſúchten·
Mit fv́nf bimenten rein ſol ſi gemenget ſin·
trúwe vn̄ zucht milti vn̄ manheit hoͤꝛt dar in·
da bi ſol maſet búlvern ſmeken vn̄ trúchten·
diſe latwerie iſt er genant
ein bals ob allen ſpiſen·
mit ir wirt ſchanden not entrant·
ſi zimt nicht dem vnwiſen·
wē ſi wont ſtete bi·
der iſt voꝛ hǒbt ſchandē vri·
wol an des lip· d̾ latwerien bv́chſe ſi·
in reineſ lop ſin hoher nam· wirt bloͤien vn̄ frúhten·

Wenne ich gedenke was ich was ald was ich bin·
ald was ich w̾den můs· ſo iſt alle min froͤide da hin·
vn̄ wie die tag mis lebendes lǒffen· vō mir ſwinde·
vn̄ iſt das nicht ein iamer ſúfzē bernde not·
das ich vō tag ze tage můs fúrhten den tot·
wie er mich bꝛinge in der vnreinen wúrmē geſinde·
wie ſolt ich da bi vro geſin·
ſo ich das als betrachte·
ſo han ich an dem herzen min·
michel groſſer achte·
wie das min ſel doꝛt kvmb̾ dol·
mit ſv́nden was mir ê· ſo wol·
almechtig h̾re dú biſt alſer gnaden vol·
hilf mir daſ min ſel doͤꝛt vor dir gnade vinde

Anmerkungen (Wikisource)

1. Vorlage: koꝛn.