Wiſſet alle dc ich kann

Wiſſet alle dc ich kann
gv̊tē wibē in daſ herze ſehen·
ſwc ir lip hat kleider an·
da dvrh kan ich alle ir tvgende ſpehē·
hat ein frowe miſſetat·
iender in ir herzē ſchꝛin·
die tv̊nt mir bekant dú ǒgē min·

Menig̾ frowē ſchoͤne ſiht·
der doh nimt Ir gvͤte kleine war·
der enbin ich einer niht·
ich kan al ir tugēde merken gar·
ſol den frowē iemā wol·
ſpꝛechē dc tůt min mvnt·
wan mir ſint gvͤte wūd̾ kunt·

Mir ſint alle ir tvgende gar·
vn̄ ir gvͤte volleklich erkant·
da vō han ich dꝛiſſeg iar·
in ir dienſt ritt̾liche v̾ſwant·
han ich iender miſſetan
gegē den gv̊ten daſt mir leit·
des bin ich ze bv̊ſſe in vil bereit·

Swie ich in ir h̾zen grunt·
alle ir tugēde ſvnder mv́ge ſehen·
dc wil ich iv machē kvnt·
ſo dc ir der warheit mvͤſſent iehen·
mit gedankē ich ir ſitte·
vn̄ ir mv̊t betrahte gar·
da mit ich ir heinliche alle ervar·

Swas ein frowe tugēde hat·
dv́ mv̊s vs ir h̾zen grūde gan·
ſam dc ſaf vs wurzen gat·
in vil mange blv̊me wolgetan·
dv́ wipheit mv̊ſ ſin getrúwe·
da vō eret frowē lip·
da ſwa man ſi nennet wiplich wip·

Ich han miner frǒwē lip·
vn̄ ir herze fvnden wandels vꝛi·
in geſach nie wiplich wib·
der ſo hohe tvgende weren bi·
in ir herzē kan min ſin·
niht ervinden noh erſpehē·
wā des man ir fúr tvgēdē mv̊s iehen·

Do ich erſt ir rede vernam·
vn̄ ich ī ir reines h̾ze ſach·
da vand ich zuht wiplich ſcham·
da vō gihe ich noch des ich do iach·
dc mir nie wib geviele bas
ſi iſt kv́ſche ſtete gv̊t·
ſchoͤne hohgeboꝛn wiplich gemv̊t·