Wisset alle dc ich kann

Wisset alle dc ich kann
gv̊ten wiben in das herze sehen·
swc ir lip hat kleider an·
da dvrh kan ich alle ir tvgende spehen·
hat ein frowe missetat·
iender in ir herzen schrin·
die tv̊nt mir bekant dú ǒgen min·

Meniger frowen schoͤne siht·
der doh nimt Ir gvͤte kleine war·
der enbin ich einer niht·
ich kan al ir tugende merken gar·
sol den frowen ieman wol·
sprechen dc tůt min mvnt·
wan mir sint gvͤte wunder kunt·

Mir sint alle ir tvgende gar·
vnd ir gvͤte volleklich erkant·
da von han ich drisseg iar·
in ir dienst ritterliche verswant·
han ich iender missetan
gegen den gv̊ten dast mir leit·
des bin ich ze bv̊sse in vil bereit·

Swie ich in ir herzen grunt·
alle ir tugende svnder mv́ge sehen·
dc wil ich iv machen kvnt·
so dc ir der warheit mvͤssent iehen·
mit gedanken ich ir sitte·
vnd ir mv̊t betrahte gar·
da mit ich ir heinliche alle ervar·

Swas ein frowe tugende hat·
dv́ mv̊s vs ir herzen grunde gan·
sam dc saf vs wurzen gat·
in vil mange blv̊me wolgetan·
dv́ wipheit mv̊s sin getrúwe·
da von eret frowen lip·
da swa man si nennet wiplich wip·

Ich han miner frǒwen lip·
vnd ir herze fvnden wandels vri·
in gesach nie wiplich wib·
der so hohe tvgende weren bi·
in ir herzen kan min sin·
niht ervinden noh erspehen·
wan des man ir fúr tvgenden mv̊s iehen·

Do ich erst ir rede vernam·
vnd ich in ir reines herze sach·
da vand ich zuht wiplich scham·
da von gihe ich noch des ich do iach·
dc mir nie wib geviele bas
si ist kv́sche stete gv̊t·
schoͤne hohgeborn wiplich gemv̊t·