Wibes guͤte nieman mac

Wibes guͤte nieman mac·
volloben an ein ende gar·
min herze blvͤt nv manigen tag·
si machet mich gar sorgen bar·
swenne ich si sihe gekleidet stan·
vnd also schone vor mir gan·
alsam die engel wolgetan·

Ein wib mich des betwungen hat·
dc ich ir iemer dienen mv̊s·
der lib vil wol ze wunsche stat·
ir roter mvnt git reinen grůs·
ich han den wunsch an ir gesehen·
das man ir mv̊s dc beste iehen·
oder ich kan niht wibe spehen·

Diner reine troste ich mich·
noch bas danne ich gedienet han·
dv bist eine der wil ich·
mit trúwen wesen vndertan·
des tages swenne ich dich sehen sol·
so wart nie manne nie so wol·
vnd ist min herze froͤiden vol·

Hohen mv̊t ich von dir han·
des weis ich nieman mere danc·
dv bist gůt an argen wan
ich dien dir iemer ane wanc·
nv sprich dc es din wille si·
so enwurde ich niemer vri·
vnd volge dir mit dienste bi·