Wichet vmbe balde sorge vnd angest von der strâsse
[242v]
Wichet[WS 1] vmbe balde sorge vnd angest von der strâsse·
lat die wunnebernde froͤide fúr·
es enzimt ú beiden vf min trúwe niht zemâsse·
swa ir mit ir dringet an der túr·
strichet von dem lande sam der erre winder von vns hin·
lant die froͤide mit dem svmer sin·
Hoher mv̊t ist her gewesen von vns hart ellende·
wol vns dc er ist nv wider komen·
nv sol vnser[WS 2] swaches trvren haben ein ende·
sit vns sorge vnd angest ist benomen·
swer nv truret der ist verzaget an gv̊ten dingen gar·
wúnschet dc er niemer wol gevar·
Nieman[WS 3] kan mit truren siner not niht vber winden·
da von wil ich hohes mvͤtes sin·
man mv̊s mich in hohem mv̊te vnd ouch bi froͤiden vinden·
also wil dc spilnde herze min·
mir gestv̊nt der mv̊t so ho nie bi miner zit·
wol ir dú mir hohgemvͤte git·
Das ist ein wib dú wol mit tvgenden kan ir wipheit kroͤnen·
ir wiplicher mv̊t ist wandels vri·
ich gesach nie wibes lip so gv̊ten noh so schoͤnen·
ir ist reine wibes fůre bi·
si ist ein vrǒwe von gebvrt so ist ir svͤsser lip·
von ir tvgenden ein vil wiblich wib·
Swer ir reinen svͤssen lip mit minen [243r] ǒgen sehe·
den lîesse ich si so lieblich schone sehen·
dc er ir vor allen wiben hoher eren iehe·
kvnde er als ich wibes tvgende spehen·
so mvͤs er von warheit sprechen seht dc ist ein wib·
der von rehte dienet ritters lib·