Wol mich es iſt ergangē

Wol mich es iſt ergangē·
als ich lange han gegert·
ia han ich ſi gevāgē·
vō der ich ſol werden wert·
ſit dc ichs ī bandē han·
ſo iſt min beſter wan·
ſi ſol gvͤte an mir began·

Si ſol mir froͤide vn̄ ere·
da bi w̾nde ſelde geben·
alde ich mv̊s iem̾ mere
ſvnder troſt in ſoꝛgē leben·
aller miner froͤiden pfant·
vn̄ ſoꝛge bant·
dc ſtat alles in ir hant·

Swie kleinē ſis enpfinde·
ſi mv̊ſ mir gebvnden ſin·
bant da mit ich ſi binde·
dc ſint alle die ſinne min·
herze vn̄ aller min gedank·
trúwe an allen kranc·
rehte ſtete an allē wanc·

IN min vil ſende h̾ze·
mittē han ich ſi geleit·
da lit ǒch al min ſmerze·
da lit ǒch all min klagēde leit·
dien zwein ſwie leit es mir ſi·
mv̊s ſi ligē bi·
ſi getuo mich ir beider vꝛi·

Ia laſſe ich ſi wol dingē·
ſchone als ein gevangen^{[WS 1]} ſol·
mag ſi mir helfe bꝛingē·
vnde troſt fúr ſende dol·
hab ir ſilber vn̄ ir golt·
ſi mir anders holt·
ich wil niht wā ir minne ſolt·

Dú mīnekliche gv̊te·
vn̄ dú w̾de hohgemv̊te·
was hilfet alle ir hv̊te·
ſi iſt voꝛ mir vnbehv̊te·
wie kan ſi behvͤten das·
der ich nie v̾gas·
ich gedenke ir bas vn̄ bas·

Ir wiblich gvͤte machet·
in gedenken· mich vil fro·
min mvnt vō froͤidē lachet·
ſwēne ich mir gedenke ſo·
dc nie wib wart me ſo guot·
noh ſo wol gemv̊t·
der gedanc mir ſanfte tv̊t·

Anmerkungen (Wikisource)

1. Vorlage: gen.