Topographia Braunschweig Lüneburg: Statt Blanckenburg

Statt Blanckenburg.

Die Statt Blanckenburg hat den Nahmen von dem Schloß Blanckenburg / vnd das Schloß den Namen von dem Felsen Blanckenstein / darauff dasselbe gebawet. Zu welcher Zeit / vnd von wem nun die Statt erbawet / davon hat man keinen grund / daß Sie aber wo nicht eben so alt / doch auch nicht viel jünger / als das Schloß seyn müsse / ist ausser allen Zweiffel. Es liget diese Statt in einer gesunden Pflege / contemplatione deß Schlosses gegen Norden / am Fuß deß Schloßberges / Sie ist aber auff gut alt Frenckisch befestiget / vnd mit Mauren vnd Thürnen zimlich verwahret.

Sonst ist Sie von je auß der wohllöbl. Herren Grafen zu Blanckenburg vnd Reinstein Residentz Statt / vnd metropolis der gantzen Graffschafft Blanckenburg Reinstein gewesen / vnd wie wohlermelte Herren Grafen vor Jahren / wegen ihrer Macht vnd Gewalt / guten theils so hitzig für der Stirn gewesen / daß Sie alles auffs Faustrecht gestellet / vnd mit den benachbarten Stifftern vnd Stätten manche Haarheutsche gewaget / Also hat die gute Statt Blanckenburg dabey vnter keinen Rosen gesessen / sondern die Haar zum offtern mit darzu thun / vnd Leib vnd Leben in die Schantze setzen müssen / sich aber dabey jederzeit vnverweißlicher Trew / vnd also erzeiget / daß die Herren Grafen Sie lieb vnd wehrt gehalten / vnd mit so stattlichen privilegiis in Gnaden angesehen / daß Sie auch damit mancher grossen Statt zuvor thut.

Anno 1182. hat Keyser Friederich Barbarosa / darumb / daß die Grafen zu Blanckenburg / vff ihres ordentlichen Lehenherrn / Hertzogen Heinrichen deß Lewen Seiten / wider den Keyser / steiff vnd fest gehalten / sich mit einem grossen Heer für Blanckenburg gelagert / vnd die Statt / wiewol sie zimblich Widerstand gethan / eingenommen / daher dann der Ort / da deß Keysers Läger gewesen / noch auff den heutigen Tag der Keyser-Plan genennet wird.